Магтаалнууд

Үүдэн Сүмэтэй Алхана шэмэгтэй,
Үльгэр домогтой Онон гол энгэртэй,
Дуутай суутайнууд нютаг, нугатай
Дульдурга, Могойто дали жэгүүртэй

Дабталга:
Жабхалан мандуулаа бүгэдыемнай
Амгалан дэлгэрхэн Ага нютагнай!

Обоо, наадан, найртаа соло баратай,
Оюун бэлигтэй зоноороо алдартай,
Анханай дэмбэры үлзы буянтай,
Ажалша малша хэр угай арадтай.

Дабталга

Тайбан найрамдаа улас түрэнүүд соо
Түрүү зэргэдэнь хүгжэжэ хододоо
Үндэр Туг, одотой, өөдөө Хии Моритой
Үргэлжэ hалбарыш энхэ жаргалтай.

Дабталга

Хабтагай Агымнай тала дайдада
Хан үндэр Ууладань нарамнай эртэ манданхай.
Хамаг зомнай барандаа буян хайрадань
Хүндэтэй обоодонь мүргэжэ одоо хүртэнхэй.
Ум маани бадмай хум,
Ум маани бадмай хум!

Үргэнхэн Агымнай тала дайдада
Үлиртын оройдонь нарамнай эртэ яларанхай.
Улад зомнай үргэлтэй буян хайрадань
Үндэр обооhоонь, дасанhаань одоо хүртэнхэй.
Ум маани бадмай хум,
Ум маани бадмай хум!

Аглагхан Агымнай тала дайдада
Алхана ууладань нарамнай эртэ жарганхай.
Арад зомнай амгалан буян хайрадань
Агуу обоодонь мүргэжэ булта хүртэнхэй.
Ум маани бадмай хум,
Ум маани бадмай хум!

Элдин сагаахан нарата дэлхэй
Энхэхэн амгалан мандаг лэ ходо.
Эбтэйхэн эетэй бүхы арад зон
Энхэхэн жабхалан мандаг лэ ходо.

Үбгэн бууралхан аха захаяа
Үргэжэ залуушуул мандаг лэ ходо.
Угайнгаа нангинхан ёһо заншалы
Үргэжэ жабхалан мандаг лэ ходо.

Гүнэй бидэнэй жаргаа нютагта
Гоёхон шэнэхэн дасан толороо.
Гайхамшаг үүргэтэй дасандаа одоол
Гороолон мүргэжэ буян хуряая.

Боди сада сэдьхэлтэй
Буригүйнүүд ябая.
Сэмүүн сагаан сэдьхэлээ
Хирэгүйгөөр сахия.

Дабталга:
Арбан хара нүгэл хилэнсэг
Зайсаг, тэбшыт, нарилая,
Аригуун ниигэм буян дэмбэрэл
Наманшалан зальбарая:
«Эхэ зургаан зүйл, хамаг амитан
Энхэ байг, хөөрхээ.
Ум маани бад май хум
Ум маани бад май хум».

Аха захаа хүндэлжэ,
Ашын сэгнэн энхэрэе.
Тулга мүлшэ нэгэндээ
Туhа хүргэн анхарая.

Дабталга:

Газар, уhан, агаараа
Гамнан, үлзы амидарая
Түшэг, уула, обоогоо
Тахин зулаа бадараая.

Дабталга:

Бурхан, Тэнгэри, Сахюусамнай
Бүгэдымнай үргэмэй.
Одо заяан, Хии моримнай
Өөдөө байhай мүргэмэй.

Дабталга:

Нарата, хорбоо юртэмсэ
Нангин сагаан дэлхэймнэй
Тодхор, аюул, усалгүй
Тайбан мүнхэ болтогой!

Дабталга:

Cэнхирхэн Ононой сэлгеэхэн хойморто
Сэсэгтэ ногоохон добо дээрэ
Шэжэрхэн алтанхан ганжараа яларган
Шэнэхэн Гүнэймнай дасан байна.
Сагаахан буянай сэсэнхэн зарлигтай
Сэдьхэлы уладай шэмэглэн байнал.
Ум маани бад май хум,
Ум маани бад май хум.

Харьялаа Ононой хонгорхон хойморто
Халюураа ногоохон добо дээрэ
Холоһоо ялараа ганжараараа даллаа
Хүн зондо ашатай дасан байна.
Сэсэнхэн сагаахан Ламбагайн анханда
Шэлэһэн нютагта мүндэлөөл эндэ.
Ум маани бад май хум,
Ум маани бад май хум.

Тунгалаг Ононой тэгшэхэн хойморто
Тунгахан ногоохон добо дээрэ
Арадтаа энхэхэн амгалан, жабхалан
Абарал буянай айлдаа дасан.
Даша Чойнхорлинай алдартай солотой
Дошхон Шойжил агуу Сахюусантайл
Ум маани бад май хум,
Ум маани бад май хум.

Орьёл үндэр Алхана,
Онон үргэн мүрэнтэй,
Тала дайдаар атарлаа
Табан хушуу малнуудтай

Дабталга:
Ага Найман Эсэгын
Агуу найрта түрүүлһэн
Агта хурдан хүлэгтэ
Соло дууданам.

Элдин дэлгэр анханай,
Эбтэй тэнюун байдалтай,
Эрдэм, соёл, ажалдаа
Эдэбхитэй арадтай

Дабталга:

Үлзы бүхы нютагтаа
Үндэр түшэг обоотой,
Улад зондоо буянтай
Үргөө шүтөөн дасантай

Дабталга:

Тунгалаг Ононой элдин хойморто
Тугшанай шэнэхэн гоё дасан байна.
Тойроһон аймаг зоной байдалда
Тэгшэхэн буян хурылан байна.
Ум маани бад май хум,
Ум маани бад май хум.

Дүрбэн зүг бүриһөө түшэг обоотой
Дуулимхан Тугшанда гоё дасан байна.
Дэмбэры энхэ буян ашатай
Дэлгэрээр зондоо аахарайлан байна.
Ум маани бад май хум,
Ум маани бад май хум.

Үлиртэй, мойһотой Онон мүрэнэй
Уужамхан Тугшанда гоё дасан байна.
Үлзыхэн һайхан буян бадараан
Уладхан зоноо үргэжэ байна.
Ум маани бад май хум,
Ум маани бад май хум.

Һаргамаар ганжартай гоё дасамнай
Һама бурхан һүртэй ехэ Сахюусантай.
Галдан Дишимплиин нангин нэрэтэй
Гайхамшаг ехэ алдар солотой.
Ум маани бад май хум,
Ум маани бад май хум.

Элдин Ага-Хангилнай
Эрын гурбан наадатайл.
Эбэр номоор харбалгын
Энэл мүрысөөн ая тайл.

Барээ, барээ, бароо даа,
Баатар мэргэд тодорхонь.
Гоеэ, гоеэ, гоёо даа,
Голшол мэргэд тодорхонь. 

Ага найман эсэгээ
Алдаршуулан суурхаhан
Дандар – мэргэн һорёошон,
Дархан солыень магтаял.

Барээ, барээ, бароо даа,
Баясан солынь магтаял.
Гоеэ, гоеэ, гоё даа,
Гайхалай мэргынь магтаял!

Олон һуры голлоһон
Ластии ходол тудажа,
Илан гараа абаргадаа
Уран бараяа татаял.

Барээ, барээ, бароо даа,
Орой мэргэн байнаш даа
Барээ, барээ, бароо даа,
Одоол гоё мүрысөөн даа!

Хүхэхэн Булгаты тойрогшо
Хүүежэл урдаа Ономнай.
Хүүеһэн Ононой хойморто
Хүрин зандан дасан байна.
Хүрихэн зандан дасангынь
Хүжэ алтан ганжартай.
Хүжэ алтанхан ганжарынь
Хүреэнэй ламын арамнайтай.

Шарахан Булгаты тойрогшо
Шааяжал харьяа Ономнай.
Шааяһан Ононой хойморто
Шара зандан дасан байна.
Шарахан зандан дасангынь
Шара алтан ганжартай.
Шара алтанхан ганжарынь
Шажанай ламын арамнайтай.

Улаахан Булгаты тойрогшо
Урасхал түргэн Ономнай.
Урдаһан Ононой хойморто
Улаан зандан дасан байна.
Улаанхан зандан дасангынь
Утайһаа залаһан ганжартай.
Утайһаа залаһан ганжарынь
Ороной ламын арамнайтай.

Шойжол агуу Сахюусантай
Сүүгэлэйм дасан үргэмэй.
Даша Чоймполинг алдартай
Дасандаа һүгэдэн мүргэмэй.
Ум маани бадмай хум,
Ум маани бадмай хум.