Yхибүүдэй дуунууд

Альган дээрээ бүүбэйлэн,
Аша зээгээ үргэлсөөт.
Эльгэн дээрээ энхэрэн
Эды томо болголсоот.

Дабталга:
Хүгшэн эжы, хүгшэн аба,
Нагаса эжы, нагаса аба.

Эгээл ехэ хүндэтэй
Энхэ аша буянтай,
Үлзы сагаан үреэлтэй,
Удхаар сэсэн һургаалтай

Дабталга

Сарюун һонор, хүхюунүүд,
Дорюун элүүр, хүнгэнүүд
Ута наһа эдлыта,
Удаан мантай жаргыта.

Дабталга

Шимни үүлэн тээшээш,
Бишни газар тээшээб,
Бишни үүлэн тээшээб,
Шимни газар тээшээш:

Дабталга:
Дээшээ – доошоо,
Дээшээ – доошоо,
Дүүжэн – даажан,
Дүүжэн – даажан.

Шубуун мэтэш — өөдөө,
Шулуун мэтэб — доошоо,
Һолир мэтэб — өөдөө,
Һомон мэтэш — доошоо.

Дабталга:

Наран ойрол намдаш,
Газар дүтэл шамдам.
Наран тээшээш, шимниш,
Газар тээшээб бишни.

Дабталга:

Шэмэг гоё һубһатай,
Шэжэр олон зүүдхэлтэй
Ёлкын галнууд бадарбал,
Ошо мүшэдөөр сасарбал.

Дабталга:
Толорог лэ, ялараг лэ ёлкомнай,
Туяа сасан яла сала гэрэлтээд.
Ханхинаг лэ, зэдэлэг лэ дуунууднай,
Хатарая тойрон ёлкоёо.

Саһан – Хүүхэн шурьюулан
Санын хурдаар ерэбэл,
Үхи хүүгэды ударидан
Үргэн дүхэриг эмхидхээ.

Дабталга:

Элдэб бэлэг сэлэгтэй,
Элдэб таабари, үльгэртэй,
Сарюун маһагар Баабай
«Салют» онгосоор буубал.

Дабталга:

Яасли-сааднай гоёл,
Яасли-сааднай томол,
Яасли-сааднай һаруул,
Яасли-сааднай салуул.

Нааданхаймнай олон,
Наадаел даа эбтэй,
Нааданхаймнай гоёл,
Наадахаб аятай.

Багшам-няаним бэрхэ,
Багшам-няаним сэбэр,
Багшам-няаним уран,
Багшам-няаним урин.

1.Хун сагаахан хонид бии,
Хуларша гүүн, морид бии,
Хараш, сагаанш ямаад бии,
Хүринш, малаанш үнеэд бии.

Дабталга:
Табан хушуу малнуудһаа
Тэмээн үгыл манайда,
Бүхы малай түлнүүдһээ
Ботогон үгыл мүнөөдөө.

2. Хурьгад дарьяад, шууяатай,
Унагад гүйлдөөд, зугаатай,
Эшэгэд наадаад өөрэнүүд,
Тугал тоонгүй томоотой.

Дабталга:

3. Гэрэй үшөө амитадһаа
Гахай, нохой, миисгэй бии.
Галуун, тахяа, нугаһад,
Гайтай ууртай индюк бии.

Дабталга:

Миисэгэйхэн миисэгэй,
Минии эрхэ миисэгэй,
Матан һүүлээ шүргөөжэ
Мяха, һүмбэй эридэг

Мяу, мяу… Хэр-хэр… Мурр-мурр… Мяу!

Миисэгэйхэн миисэгэйм,
Минии арюун миисэгэй
Жаахан нарай байхаһаа
Загаһанда адатай.

Миисэгэйхэн миисэгэй,
Минии шуран миисэгэй
Хулганые барижа
Хүхюу гоёор наададаг.

Тоонто нютагнай одоо һайхан,
Түүхэтэ һургуулим ходо һайхан,
Түрүүшымни багша онсо һайхан,
Түрэлхид, аймаг зон булта һайхан.

Дабталга:
Хүн болгоо бултанайнь
Халуун анхаралаар
Хуби заяам азатай,
Баясан урмашамаар.

Анханайм нютагни юунһээш үнтэй,
Алдарта һургуулиим суртаал үнтэй,
Аятай багшымни һургаал үнтэй,
Абымни, эжымни үреэл үнтэй.

Дабталга:

Элдинхэн нютагаа хаанаш магтааб,
Эрдэмтэ һургуулим даллаал, магтааб,
Эрхимхэн багшынгаа сэсынь магтааб,
Эжынгээ, абынгаа ашынь магтааб.

Дабталга:

Анхан «А»-һаа эхилээд
«Я» үзэгөөр дүүргөөбди,
«Аба», «эжы», «багша» гээд
Алдуугүйгөөр бэшээбди.

Дабталга:
А, бэ, вэ, гэ, е, ё, жэ …
Алдуугүйгөөр бэшээбди,

Шүлэг, үльгэр, таабари
Сээжээр хэлээд туршаабди,
Басниин сэсэн заабари
Бидэ һайнаар ойлгообди,

Дабталга:
Үзэг бултынь танинхай
Уншаабди. Улам тодоор уншанаб.
Үзэглэлни, баяртай,
Үшөө бэрхээр һурахаб.

Дабталга:

Үргэн ехэ эрдэмэй
Үүдэ нээжэ үгэбэш,
Үзэглэлни, баяртай,
Улам бэрхээр һурахаб!

Дабталга:

Май һарын хорин хоёр
Михуулын үдэр.
Хүжэ ногоон хүбшэдэ
Хүхы донгодоо.
Гүг-гүүг, Гүг-гүүг,
Хүжэ ногоон хүбшэдэ
Хүхы донгодоо.

Хонгор туруутан одоол
Тэниин ногоондо
Хонгео дууеынь зохидшоон
Бэлшээл хүдөөдэ
Гүг-гүүг, гүг-гүүг,
Хонгёо дууеынь зохидшоон
Бэлшээл хүдөөдэ.

Сэсэг намаа гоёшоон
Хүүгэд аглагта
Сэнгэн, дууряан хүхыгөө
Дуугаа татана:
Гүг-гүүг, гүг-гүүг,
Сэнгэн, дууряан хүхыгөө
Дуугаа татана.

Дуэт дуулаха вариант: 
-Шагай няhалан наадая,
-Шагай няhалан наадая.
-Намда дүрбэн бүхэ буугаал
-Намда гурба — эхилэ!

Дабталга:
Бүхэ, хонхо, морин, үхэр-
Бултынь hайнаар тания.
Хүндэн, забдан, дайрангүй
Хэмгүй гоёор наадая!

-Шагайн мориной урилдаан,
-Шагайн мориной урилдаан.
-Намда дүрбэн морин буугаал
-Намда таба – гартабаш!

Дабталга:

-Шагай шүүрэжэ наадая,
-Шагай шүүрэжэ наадая.
-Бишни табан шагай шүүрээб,
-Бишниш табы – тэнсээбди!

Дабталга:

Сагай хүрдын эрьесээр
Шэнэ жэл найэрьебэл.
Сагдуул ногоон хасууряа
Шэмээд зомнай сэнгэбэл.

Дабталга:
Халуун амаршалганууд
Хэтын жаргал хурылна,
Хамаг удхань бүрилдээд
Хэрэгээрнайл бэелһэйл!

Сарюун Жабар Баабаймнай
Элбэг бэлэг, зугаатайл.
Сэсэн Саһан Хүүхэмнай
Элдэб һонин наадатайл.

Дабталга:

Хүгшэн залуугүй хэмнайш
Ёлкоёо тойрон гороолоол,
Хонгёо дуутай, хүгжэмтэй
Ёһоор хүхин зугаалаал.

Дабталга:

Шэнэ Жэлнэй шэнээр
Шэжэр ёлкоо шэмээл.
Нүхэд, наашаа яарыт,
Намжар гоёл, харыт!

Саһан-Хүүхэн зээтэй
Жабар Үбгэн Таабай –
Холын айлшад ерээл,
Һонин зугаа дэлгээл.

Хатар, шүлэг, дуундаа
Хамаг хүүгэд обтойл:
Таабай магтаад, таалаа,
Шангынь – наадхуур, хампеэд!

Клоун, Петрүү таатай
Хошон аашаар – аатайл!
Хүнүүд дандаа багтай –
Таниит, хэд ааб, намтай.

Гоёор үреэл түүрээн,
Гүндүү тулам сооһоо
Бэлэг обоо-хүбөө
Үбгэн Таабай үгөө!

Һүниин арбан хоёр -:
Шэнэ жэлэй дохёо
Кремлиин часууд гоёор
Эфир дорьбоон сонёо!

Шэнэ Жэлээ угтаад,
Арад зомнай хэлээл:
«Энхэ мүнхэ мандыт,
Шэнэ Жэлнүүд, хэзээш!»

Ноб ногоохон хасуури
Бидэ шэмээб ди,
Нааданхай олы, гоеы
Үлгөө, зүүгээбди.

Дабталга:
Ёлкодоо булта хүхин,
Ёһоор гоёор
Шэнэ жэл
Угтан сэнгэел!

Саһан Хүүхэн өөры даа:
Зугаа эмхидхээ.
Жабар Үбгэн хөөрүү даа:
Бэлэгээ дэлгээ.

Дабталга:

Барас, Туулай, Һармагшад,
Винни Пух, Клоун..,
Бабжа, Гэсэр, Аламжа.. –
Багтай зон олон!

Дабталга:

Шүлэг, хатар, таабари…
Дуумнай зэдэлээ.
Шэхэр, алим, нааданхуур –
Шанда би хүртөөб.

Дабталга:

Мартын найман hайхан даа
Манай эжын hайн үдэр.
Эжым, намдаа найда даа
Эрхим бэрхээр байхаб даа.

Дабталга:
Эжым, эжым, эжым,
Энэ дуугаа баринаб.

Урин эжым хажуудам
Удаан жаргал эдлэhээт.
Үдэр бүри түнтүүем
Үндэн, таалан энхэрhээт.

Дабталга:

Буян сагаан сэдьхэлтэй,
Бүхы хүнhөө тон мээхэй,
Эжым, тандаа баясан
Энэ дуугаа баринаб.

Дабталга:

Эльгэлэн энхэрһэн
Элинсэгэй гайхамшаг
Элдинхэн нютагайм
Эхэ байгаалиин
Хэндэмнайш хэтэдээ
Хэрэгтэй шухала
Нангинхан баялиг
Наринаар гамная.

Сэлмэгхэн огторгой,
Сэбэрхэн агаарнай,
Сэсэгүүд, жэмэсүүд
Сэнтэйл хэндэмнайш.
Харзалан булагаа,
Харьялаа голнуудаа,
Һаргама нуурнуудаа
Һайхашаан гамная.

Хонгёохон жэргэмэл,
Ханхинаһан хүхыгөө
Хүн бүхэн шагнажа
Хүхин жаргаг лэ.
Жэгүүртэн, ан, гүрөөл,
Загаһаш, гүрбэлөөш
Жэгдэхэн анхаран
Жэгтэйгээр гамная.

Бэеэр жэжэхэн өөдэгүйб,
Баряад, нүхэдүүд, бү дайлыт.
Хапус, морхообто дуратайб,
Хаа яа заа зуу хүртөөгыт.
Аа-аа, ээ, хүртөөгыт.

Дайсан амитан ябаа һаань,
Дэрэг шэхэмни танидаг.
Дойлон барихаа һанаа һаань,
Дүрбэн хүлни абардаг.
Аа-аа, ээ, абардаг.

Бүмбэр, бүмбэр харайжа,
Бүмбэгэ мэтээр гүйнэлби.
Баран амитад намайгаа
Барихаа болиит, гуйналби.
Аа-аа, ээ, аймшагтай!

Газартаа байгаад тэнгэри шэртэнэм,
Галтан толороол замби дэлхэй.
Аржагар мүшэдүүд уринал даа намай
Айшалан наашаа ерэ гэнхэй.

Нангинайл нангин одото юртэмсэ
Намда тон дүтэ болонош даа.
Зүрхэнэйм һудалы мэргэнээр оножо,
Зүүдэ зүндэмни оронош даа.

Орёохон эрдэмы эрхимээр шудалаад,
Оролдон анханһаа һурахам ха.
Оньһото онгосоор һолирһоо хурданаар
Огторгойн уудамаар ниидэхэм ха.

Үдэр газаа дулаахан,
Үдын наран улаахан,
Үргэн дайдам амгалан,
Үнгын сэсэг надханал.

Дабталга:
Наран, наран дээрэмнай
Намжар һайхан зээрэмхэй

Манай наран сэлмэгхэн,
Манай шарай сэбэрхэн,
Манай зугаа сэсэнхэн,
Мүнөө дуугаа эхилэел:

Дабталга:

Наран үглөө мандаха,
Наадан хүүгэд жаргаха,
Энэл дуугаа татаха,
Энхэ нараа магтаха.

Дабталга:

Сэнхирхэн дуулимхан огторгойн уудамы
Сэхэ харбажа дэгдэхэм ха.
Абяанhаа хурданаар онгосоор зуралзан
Агаар эсхэжэ ниидэхэм ха.

Машинын удаахан хүрэхэ газары
Мэнэл хурданаар гаталхаб даа.
Yүлэнэй забhараар дээрэhээ нэлэнхы
Yргэн дэлхэйгээ харахаб даа.

Мүнөөдөө саарhахан онгосом жэжэхэн,
Минии хүсэлы далитуулнал.
«Ёhотойл эрэ хүн энэмнай!»-гэлсэхэй
Лётчик болохоб заатагүйхэн.
Аhэй!

Хэрэг ажал хэхэдээ,
Хэмгүй уран манай гарай
Табан сэбэр хурганууд
Таатай зохид нэрэтэйл даа.

Дабталга:

Барбаадай, батан туулай,
Тоохон тобшо, толи байса,
Бишыхан шэгшүүдэй!
Эрхы, долёобор,
Дунда хурган, нэрэгүй хурган,
Шэгшы хургахан – бидэ табан.

Тоомгүй жаахан бидэнэр
Тоо, бэшэгтэ һуранабди.
Табан хурган тухайгаа
Танил дуугаа дууланабди.

Дабталга: