Песни на стихи поэтов РФ

Дондог Эреэнэй дуулга шэмэг тайгада
Донгодон байгаа хүхын аялгаар,
Үлгэн Үльдиргэ, Хулинда нютагуудаа
Үгэлэн дуулан ябаха жаргалтайб.

Дабталга:
Дуунайм эхин, дуранайм эхин
Ага-Хангилнай, Ага-Хангилнай.

Ая гангата түрэл дайдым эльгэндэ
Аятай үе наһам жэргэнэл.
Алдар солыень һайхашаан үргэжэ,
Аялга дуумнай зохидоор шэнхинээл.

Дабталга

Эхэ нютагни, жаргал дүүрэн гуламтам
Ирагуу дуугаар ходол ханхиныш!
Урган задарһан улаалзай сэсэгтэл
Үеын үедэ дэбжэжэ һалбарыш.

Дабталга

Аглаг нэлэнхы Ага нютагнай
Ая гангаараа хангалтаа.
Атар тарган хонин һүрэүүд
Аажам талаяа шэмэглээ.

Хүбүүд, басагад хүлэг моридоо
Хүсэ шадалаар табинхай.
Нармай дайдаар намжаан толоёо
Наран дэлгэжэ адханхай.

Элдин хабарай үнгын сэсэгтэл,
Эхэ нютагнай һалбараал.
Хамаг зомнай урган хүгжэжэ,
Хэрэг, үйлөөрөө алдаршаал.

Үргэн дэлхэйн энгэртэ
Үльгэр һайхан энхэргэн
Үеын үедэ бидэнэй
Үлзы нангин гуламта

Дабталга:
Амгалан тайбан мүнхэ жаргалтай
Ага түрэлхи нютагнай

Алдар солоор элирһэн
Арад зоноор золтойлши
Хонгор талаар бэлшэһэн
Хони малаар суутайлши.

Дабталга

Арад зоной үршөөһэн
Алтан үлгым хүндэтэйш.
Дура зүрхөөр үреэһэн
Дуугаа шамдаа үргэнхэйб.

Дабталга

Аюул амитад ойсоомнай
Айхабтар одоол олондаа.
Амар ябаха гээшэмнай
Айдаа, хөөрхэй, хомор даа.
Аа-аа, ээ, аймшагтай!

Бэеэр жэжэхэн өөдэгүйб,
Баряад, нүхэдүүд, бү дайлыт.
Хапус, морхообто дуратайб,
Хаа яа заа зуу хүртөөгыт.
Аа-аа, ээ, хүртөөгыт.

Дайсан амитан ябаа һаань
Дэрэг шэхэмни танидаг.
Дойлон барихаа һанаа һаань
Дүрбэн хүлни абардаг.
Аа-аа, ээ, абардаг.

Бүмбэр, бүмбэр харайжа
Бүмбэгэ мэтээр гүйнэлби.
Баран амитад намайгаа
Барихаа болиит, гуйналби.
Аа-аа, ээ, аймшагтай!

Айдархан нүхэдтэйм
Анхаран үргэһэн
Арадтаа хүндэтэй
Агымнай һургуули

Дабталга:
Алдарта һургуулияа
Ашата багшанараа
Һайханаар хэтэдээ
Һанагшаб сэдьхэлдээ.

Эрдэмхэн бэлигэй
Үрэһэ тарижа
Эрхимхэн ябахы
Үреэжэ захиһан

Дабталга

Залуухан бидэнэй
Зол жаргал тодолоо
Түүхэтэй, домогтой
Түрүүхэн хододоо

Дабталга

Арьялаа үндэр Алханамнай
Аяар холын домогтой.
Ага буряад нютагаймнай
Аглаг тайгын хизаар юм даа.
Аа-аа, аа-аа, Аглаг тайгын хизаар.
Далай Ламын хизаар.

Орьел уула Алханамнай
Онсо һайхан шэнжэтэй
Үргэн анхарма бүгэдымнай
Үүдэн Сүмэ шэмэгтэй,
Аа-аа, аа-аа,
Үүдэн Сүмэ шэмэг.

Эржэн шулуун Алханамнай
Элдин бүхы баялигтай.
Эршээр түгэс амарамаар
Элүүр энхын аршаантай.
Аа-аа, аа-аа,
Элүүр энхын аршаан.

Буян хэдэг Алханамнай
Бүгэдымнай тахилгатай.
Дээдын ехэ Данзан-Жамса
Далай Ламын рамнайтай.
Аа-аа, аа-аа,
Далай Ламын рамнай.

Эдирхэн хонгорхон энэ наhандаа
Эмээхэй зулгыгаар энхэрэн абааш
Эжэл газараа эрьен ерэхэдэм
Энэрхы hайханаар эльгэлэн угтанаш.

Дабталга:
Аргали, Аргали,
Амгалан hайхан нютагнай, Аргалимнай.

Сарюухан заяагаар абын нэрые
Арюухан сэбэрээр үргөөд ябанаб.
Эжым юрөөлөөр дэлгэр замуудта
Эдэбхи найдалтай зорижо гаранаб.

Дабталга

Артелиин түсэбөөр баян жаргажа
Амжалта илалта баталан гарааш.
Ага нютагай элдин хойморто
Ажана тайбанаар яалгаа татанаш.

Дабталга

Би шамдаа шүлэг зохёоноб,
Би шамдаа дуугаа дууланаб
Би шамдаа…

Бүлеэхэн һэбшээхэн үлеэнэл даа,
Бүүбэйдэл тала дуурана.
Гарыш даа, инагни, намхандаа
Газаашни хүлеэнэб шамайгаа.
Би шамдаа шүлэг зохёоноб,
Би шамдаа дуугаа дууланаб
Би шамдаа…

Үүр сайха үшөөшье үдышэг даа,
Огторгойн мүшэд уняартана.
Гансал би һүниндөө нойргүйлби,
Гансал би шамайгаа хүлеэһээрби
Шамайгаа…

Баруунхан хададаа гарахадажал
Балшархан үеынгөө сагые
Баясан hанажа үзэхэдэмни
Бодолдом уяран hанагдана.
Эрдэм бэлигтэ hур(а)гаhан
Эрхэтэ ехэ багшанарни,
Эжэл hайхан нүхэдуудни,
Элдин тэнюун нютагни.

Зүүнхэн хададаа гарахадажал
Залуухан үеынгөө сагые
Зосоогоо hанажа үзэхэдэмни
Зүрхэндэм уяран hанагдана.
Үзэг номуудта hур(а)гаhан
Үреэлтэ ехэ багшанарни,
Үетэн hайхан нүхэдүүдни,
Үлзы баян нютагни.

Үргэлжэ Онон гол шэмэгтэй
Үржэлтэй элдин даа Гүнэймнай.
Үдэһэн бидэнэй хэтэдээ
Үреэлтэй жаргаһан нютагнай.

Дабталга:
Гүнэй бидэнэй баян хэшэгтэй
Заяан хубитай жаргаһан нютагнай.

Зэрэлгээ татаhан шэлэтэй
Заяатай энхэл даа Гүнэймнай.
Үетэн нүхэдэй эетэй
Үршөөлтэй жаргаһан нютаг лэ.

Дабталга

Ажалдаа анханһаа солотой
Алдартай хүгжэһэн Гүнэймнай.
Бүгэдэ арадай хододоо
Буянтай жаргаһан нютагнай.

Дабталга

Сагаан Уулаа һанаад,
Сагаан зүүдэ манааб.
Сагаан Уулаа хараад,
Сагаан дуугаа татааб.

Дабталга:
Дулыш зүрхэнэйм аялгы
Дуулим Эхэ нютагни.

Сагаан Уула шамдаа
Сагаан эдеэ үргөөд,
Сагаан Уулам, зондоо
Сагаан үреэл хүсөөб.

Дабталга

Сагаан Уула эжым
Сагаан үлгын дуутайл.
Сагаан Уула хэтым
Сагаан замым нээгээл.

Дабталга

Газартаа байгаад тэнгэри шэртэнэм,
Галтан толороол замби дэлхэй.
Аржагар мүшэдүүд уринал даа намай
Айшалан наашаа ерэ гэнхэй.

Нангинайл нангин одото юртэмсэ
Намда тон дүтэ болонош даа.
Зүрхэнэйм һудалы мэргэнээр оножо
Зүүдэ зүндэмни оронош даа.

Орёохон эрдэмы эрхимээр шудалаад,
Оролдон анханһаа һурахам ха,
Оньһото онгосоор һолирһоо хурданаар
Огторгойн уудамаар ниидэхэм ха.

Эрдэмэй бэлигэйм гуламта
Эндэһээ эхиеэ абанхайл.
Эдирхэн наһанайм жаргалан
Энхэргэн багшаһаам үреэлтэйл.

Дабталга:
Зориг хүсэлым далижуулһан
Зугаалайм һайхан һургуули.
2. Наярлайм һайхан һур гуу ли.

Наяржал ябаһан наһатан,
Найманхан наһаяа һанагты.
Халуунхан зүрхэндөө ахатан,
Хэдыдэш сэдьхэжэл ябагты.

Дабталга

Хододоо бибэндээ дуулдажа,
Хонхошни зэдэлэн ханхинаг.
Холоһоош дүтэһөөш уулзахаа
Хүхилдэн ерэхэбди уряалдаш.

Дабталга

Онон голой хойморто,
Олон хадын хормойдо
Налгай зоной гуламта
Наруули нютаг Зүдхэли.

Дабталга:
Зориг хүсэ түрүүлдэг
Зүдхэли һайхан нютаг лэ,
Зүдхэли һайхан нютаг лэ.
А-я, һайхан нютаг лэ! — 2 раза:

Ая гангаар анхилаа
Аглаг дайдаар элдин даа.
Арса, жэмэс, аршаантай
Аятай тайгаар элбэг даа.

Дабталга

Үндэр, үржэл баянаар
Үбһэ, таряа ургуулдаг,
Үүлтэр һайтай атараар
Үхэр, хони, мал үдхэдэг.

Дабталга

«Эхэ Орон» колхознай
Эрхим түрүү алдартайл,
Энхэ ажал, байлдаандаш
Эрэлхэг баатар арадтайл.

Дабталга

Үнэнхэн сэдьхэлым хүлэгүүлэһэн
Үерлөөд ерэһэн дуран гү?
Үнгэтэ дэлхэй дэүгтэһэн
Үелхэл наһамнай иимэ гү?

Дабталга:
Шамайгаал угтажа һэргэнэб,
Шарайеш хаража һэгшэнэб.
2.Сэнтэй// -жа һэгшэнэб.

Сэнтээхэн дураяа үрэшөөһэн
Сэдьхэлдэм дүтэхэн нүхэр гү,
Шэхэндэм урихан нэрыень
Шэбэнэн ябахам жаргал гү?

Дабталга

Дүмүүхэн инагай үгэнүүдһөө
Дэбэрһэн зүрхэндэм хүгжэм гү?
Дэмбэры һаруулхан гэрэлээр
Дэнзэлһэн дурамни мүнхэ гү?

Дабтлага

Гүн сагаан талын энгэртэ
Гүрбэл гэзэгыш эльбэсэгээн,
Зүлгэ ногоон хибэс дээрэ
Зүүдэ манан үнгэрһэйб.
Огторгойһоо һарабшалаад
Ододоор буухаяа яагаабши,
Наранай элшээр харбагдаад,
Наашалхаяа яаһамши.

Дүтэлөөд һуугыш, сэнгэел,
Дүрбэн зүгһөө бүридэнхэй,
Долоон үнгэтэй һолонгоор
Домоглуулһан дангина.
Шэбэнэхэдээ — хур бороогоор,
Шэмшэрхэдээ — саһа шуургаараа,
Сэнгэхэдээ — алтан нараар
Сэдьхэл үргэн байналши.

Гүн сагаан талын энгэртэ
Гэнэн хонгорхон зүүдэндээ
Һаруул дүрыеш һайхашаажа
Һарабшалһаар үнгэрһэйб.
Огторгойһоо һабагшалаад
Ододоор буухаяа яагаабши.
Сэнгэхэдээ — алтан нараар
Сэдьхэл үргэн байналши.

Хүхэ торгон энгэршни
Хүбсэгэл далайн долгиншуу.
Хүбсэгэл далайн долгиндо
Хүльбэрхэл дуран хүрэнэл бшуу.
Хүльбэрхэл дуран хүрэнэл бшуу.

Мэлмэн хара нюдэдшни
Монголой талын мойһоншуу.
Монголой талын мойһые
Амталхал дуран хүрэнэл бшуу.
Амталхал дуран хүрэнэл бшуу.

Илдам хонгор сэдьхэлшни
Эшэгы гэртэл сэлеэтэйл.
Эшэгы гэрэй хойморые
Эзэлэн һууха хүсэлэнтэйб.
Эзэлэн һууха хүсэлэнтэйб.

Элдин А га Хангилнай
Эрын гурбан наадатайл.
Эбэр номоор харбалгын
Энэл мүрысөөн ая тайл.

Барээ, барээ, бароодаа.
Баатар мэргэд тодорхонь.
Гоеэ, гоеэ, гоё даа.
Голшол мэргэд тодорхонь.

Ага найман эсэгээ
Алдаршуулан суурхаhан
Дандар – мэргэн һорёошон,
Дархан солыень магтаял.

Барээ, барээ, бароо даа,
Баясан солынь магтаял.
Гоеэ, гоеэ, гоё даа,
Гайхалай мэргынь магтаял!

Олон һуры голлоһон
Ластии ходол тудажа,
Илан гараа абаргадаа
Уран бараяа татаял.

Барээ, барээ, бароо даа,
Орой мэргэн байнаш даа
Барээ, барээ, бароо даа,
Одоол гоё мүрысөөн даа!

Холын Москвада (нютагта)
Хоюулаа уулзаабди
Холшорхон наһандаа
Хүхюутэй ханилаабди.

Залуу наһандаа
Зулаа бадаргаабди,
Золгоһон инагни,
Золтой һуухабди.

Нарамнай хурсал
Намжархан һаруулхан
Наhанаймнай харгы
Найдамтай арьюухан даа.

Һарамнай һаруул,
Һанаамнай тэгшэхэн,
Һалбараа дурамнай –
Нангин зуламнайл!

Үдэр газаа дулаахан,
Үдын наран улаахан,
Үргэн дайдам амгалан,
Үнгын сэсэг надханал.

Дабталга:
Наран, наран дээрэмнай
Намжар һайхан зээрэмхэй

Манай наран сэлмэгхэн,
Манай шарай сэбэрхэн,
Манай зугаа сэсэнхэн,
Мүнөө дуугаа эхилэел:

Дабталга

Наран үглөө мандаха,
Наадан хүүгэд жаргаха,
Энэл дуугаа татаха,
Энхэ нараа магтаха.

Дабталга

Аажамхан тоонто нютагтаа
Айдарлаа үемни һайхан даа.
Аба эжынгээ буянаар
Амгалан һуухадам һайхан даа,
Амгалан һуухадамни һайхан даа.

Баянхан тоонто нютагтаа
Батажан үндыһэм һайхан даа.
Баабай эжынгээ буянаар
Баясан һуухадам һайхан даа,
Баясан һуухадамни һайхан даа.

Түхэреэн тоонто нютагтаа
Түлөөтэй гуламтам һайхан даа.
Түрэл түүхынгөө буянаар
Түбхинэн һуухадам һайхан даа,
Түбхинэн һуухадамни һайхан даа.

Амраг гансатаяа
Айл гэр болон түбхинөөд,
Түрэл нютагтаа
Түрэ хэжэ жаргахадам,
Абал эжын үреэлhээ
Һайхан үрээл байгаагүй.

Ажал, һуралсалда
Аяар холо түхеэрээд,
Алтан наранаар
Аян замда мордоходом,
Аймаг зоной үреэлһээ
Арюун үреэл байгаагүй.

Түби дэлхэй дээрэ
Түрүү хэрэг бүтөөхөө
Ондоо гүрэндэ
Олон жэлээр мордоходом,
Эхэ оронойм үреэлһээ
Энхэ үреэл байгаагүй.

Үхибүүн балшар наһандаа
Үглөөнэй шүүдэр махажа
Түмэн үнгэтэ сэсэгүүды шим
Түүжэ ябадагаа һанана гүш?

Саһата дайдаа махажа
Санынгаа хурдаар урилдаад
Хабтагай Агын хойморто шим
Хамта үндыһэнөө һанана гүш?

Гэнэнхэн хонгор ябахадаа
Гэнтэ хасарыш үндэжэ
«Дурланам» — гэжэ хэлэхэдэм шим
«Дуугай» — гээ бэлээлши, һанана гүш?

Сэсэг набша соо һалбаран байдаг
Сэнгүү намжаахан Һүдэнтэ нютаг.
Энэрхы урин шамаяал һанажа
Энхэрэн ябагшаб зүрхэндөө дурдажа.

//ашыеш хүндэлжэ

Аршаан булагаар горхонш харьялдаг
Арюун дулаахан Һүдэнтэ нютаг.
Анханда эндэл аятай тэнжэжэ,
Айдархан наһаяа үнгэргөөб наадажа.

Жэрьеэ шубуудай дуугаар зэдэлдэг
Жэгтэй хонгёохон Һүдэнтэ нютаг.
Жагсажа, эрын солые дуудажа
Жаргаа һэм энгэртэш инагтаа дурлажа.

Хангай дайдаараа ходол суурхадаг
Халюун налгайхан Һүдэнтэ нютаг.
Хоймортош түрэ хуримаа бүтээжэ
Хабатай һууналби ашыеш хүндэлжэ.

Хүхэхэн Булгаты тойрогшо
Хүүежэл урдаа Ономнай.
Хүүеһэн Ононой хойморто
Хүрин зандан дасан байна.
Хүрихэн зандан дасангынь
Хүжэ алтан ганжартай.
Хүжэ алтанхан ганжарынь
Хүреэнэй ламын арамнайтай.

Шарахан Булгаты тойрогшо
Шааяжал харьяа Ономнай.
Шааяһан Ононой хойморто
Шара зандан дасан байна.
Шарахан зандан дасангынь
Шара алтан ганжартай.
Шара алтанхан ганжарынь
Шажанай ламын арамнайтай.

Улаахан Булгаты тойрогшо
Урасхал түргэн Ономнай.
Урдаһан Ононой хойморто
Улаан зандан дасан байна.
Улаанхан зандан дасангынь
Утайһаа залаһан ганжартай.
Утайһаа залаһан ганжарынь
Ороной ламын арамнайтай.

Шойжол агуу Сахюусантай
Сүүгэлэйм дасан үрэгэмэй.
Даша Чоймполинг алдартай
Дасандаа һүгэдэн мүргэмэй.
Ум маани бадмай хум,
Ум маани бадмай хум.

Жаахан бидэ хамтадаа
Жарган, сэнгэн нааданабди.
Эрхы томо хурганһаа
Эхи абан тоолонобди.

Дабталга:
Барбаадай, батан туулай,
Тоохон тобшо, толи байса,
Бишыхан шэгшүүдэй!
Эрхии, долёобор,
Дунда хурган, нэрэгүй хурган,
Шэгшы хургахан – бидэ табан.

Хэрэг ажал хэхэдээ,
Хэмгүй уран манай гарай
Табан сэбэр хурганууд
Таатай зохид нэрэтэйл даа.

Дабталга

Тоомгүй жаахан бидэнэр
Тоо, бэшэгтэ һуранабди.
Табан хурган тухайгаа
Танил дуугаа дууланабди.

Дабталга

Талын зүргэ харгыгаар
Табилуулнаб морёороо.
Тангил гансам hанаандам, hанаандам-
Талаан туршахам зоригоороо

Дабталга:
Ээ-ээ-ээ, эхэ нютагни,
Элдин түрэл таламни,
Талаан намдаа юрөөгыш!

Угайхан шарайнь элихэн даа
Һэгшэнэл даа зүрхэмни.
Энэ гүбөө дабаад лэ, дабаад лэ
Уулзахал зоригтой хүн гээшэб.

Дабталга

«Мэндэ»- гэхэдээд зогсоходом
Ямарханаар харюусагшааб,
Урихан hайхан нюдөөрөө, нюдөөрөө,
Ямарханаар харагшаб.

Дабталга

Хүнэй золоор мандажа,
Хүгжэм татан жэрьеһэн,
Хүэг морёор дабхижа
Наран тээшээ зүдхэһэн
Мундаргата Түнхэмни
Алтаргана нютагни.

Аадар соогуур үнгэрхэ
Айдар наһаар орьёлһон,
Байдал золоо үнгэлхэ
Баатарнууда дэгжээһэн
Түүхээр ехэ Түнхэмни–
Түбхинэһэн нютагни.

Ая гангаар хангалтаа,
Аршаангаараа билтарһан,
Жаран үнгөөр миралтаад
Жаргалаараа жэгдэрһэн
Үлгы зөөлэн Түнхэмни –
Үнэржэһэн нютагни.

Ага һайхан нютагаймнай
Ара хоймор дэрлэжэ,
Ашата аба эжымнай
Алтан бууса һэргээжэ –

Дабталга:
Омог солгёон наһандам
Олон бэшэ, гансахан
Түрэл нютаг Аргалим –
Түмэн жэлэй жаргалан.

Зориг дүүрэн залуугайнгаа
Золто дуугаа зохёожо,
Түрэ найраа наһанайнгаа
Түбхинүүлэн бүтээжэ, —

Дабталга

Жэмэстэй ойтой нютагаа
Жэрын дуулан хүндэлжэ,
Үнэн сэхэ ажалайнгаа
Үльгэр түүхэ харуулжа, —

Дабталга

Амархан мэдэеэ мэдүүлхэеэ
Аяархан холоһоо зориболта.
Агаяа һонирхон харахаяа
Анханайм нүхэдни ерэбэлта,
Анханайм нүхэдни ерэбэлта.

Харалсаад намтаяа уулзахаяа
Холынгоо холоhоол зориболта.
Хүгжэhэн Агаяа харахаяа
Хайрата нүхэдни ерэбэлта,
Хайрата нүхэдни ерэбэлта.

Уулзажал намтаяа хөөрэлдэхөө
Утынгаа харгыгаар зориболта.
Уужамхан Агаяа харахаяа
Унаган нүхэдни ерэбэлта,
Унаган нүхэдни ерэбэлта.

Хүһөөшын адагай хабсагайн дундуур
Хүхэ шулуун эрьеэ эсхэһээр
Хүсэтэй Ономнай, эбхэн долгёо жүдхөө,
Хүүеэл, хааяал эршэмтэй.

«Тэнхэхэ Толгоймнай» үбэрээр нэмжээ
Тэгшэ талаар угалза хээлэн,
Сэбэрхэн уһаяа түлхин мэлмэрэһээр
Сэхэ мүрэмнай зүүлээл.

Хан Уула найр наадаар суутай обоотойл,
Адуун Шулуун үндэр обоотойл.
Уртымнай түшэлгэ обоо Мануухаймнай
Үлзы байдал далланхайл.

Хэтэ мүнхын үе сагта суурхуулһан
«Хээтын» агы уута гайхамшаг,
Уртымнай шэмэжэ үзэсхэлэн болоо
Урдын һонин домогтойл.

Утахан Уртаяа алдаршууланхай
Улад зониинь тэнюун түбхинөөд,
Эжынгээ, абынгаа нангин буянгаар
Энхэ тайбан жарганхайл.

Дэлгэр баян нютагтаа
Дэлгэн байгаа наадамнай
Дүтын хани нүхэдүүдэй
Дуутай байха ёhотойл даа.
Аа-аа, Аа-аа,
Дуутай байха ёhотойл даа.

Хорин жэлэй уулзаанда
Хүхин байгаа наадамнай
Хани халуун нүхэдүүдэй
Хатартай байха ёhотойл даа.
Аа-аа, Аа-аа,
Хатартай байха ёhотойл даа.

Үнэр баян нютагтаа
Уулзан байгаа наадамнай
Үеын хани нүхэдүүдэй
Үреэлтэй байха ёhотойл даа.
Аа-аа, Аа-аа,
Үреэлтэй байха ёhотойл даа.
Ёhотойл даа.

В памяти моей всегда первый школьный день, когда
Я на цыпочки пристав двери класса открывал.
Ты учитель добрый мой, на меня взглянул потом.
Ты зажёг огонь большой в сердце маленьком моём.

Ты о счастье говорил, об Отчизне дорогой.
Ты впервые мне открыл радость жизни трудовой.
Ты открыл мне ширь морей, снежные вершины гор,
Даль зеленую полей и родных долин простор.

Ты учил меня любить эту землю, этот лес,
Тайну мне сумел раскрыть звездных голубых небес.
Я запомнил навсегда первый школьный день, когда
Я учиться начинал, книгу жизни открывал.

Энээгүүр ургаһан сэсэгүүдсоо
Эжынгээ шарайе харанам.
Эжынгээ шарайе харахадаа
Эртэнэйнь буусые һананам.

Дабталга:
Дулаахан амисхалтай
Үзөөн нютагни,
Дуулимхан урасхалтай
Онон мүрэмни.

Араараа ургаһан сэсэгүүд соо
Ахынгаа шарайе харанам.
Ахынгаа шарайе харахадаа
Анханайнь буусые һананам.

Дабталга

Хойгуураа ургаһан сэсэгүүд соо
Хоерхон шарайень харанам.
Хоерхон шарайень харахадаа
Холынгоо буусые һананам.

Дабталга

Үурэй сайхаһаа шүүдэр лэнхэй
Үргэн сагаахан Үльдэргэм.
Үеын хахадһаа домоглонхой
Үнтэй хайратай амараг.

Дабталга:
Ага -Хангил нютагтайб,
Аяа хайратай нүхэртэйб.

Нараа угтажа шүүдэрлэнхэй
Намжаа сагаахан Хулиндам.
Наһыем шэмэглэн домоглонхой
Намдаа хайратай амараг.

Дабталга

Эртын наранаар шүүдэрлэнхэй
Элдин сагаахан Хилгэндэм.
Энэл наһандам домоглонхой
Эжэл гансахан амараг.

Дабталга

Наруули сагаахан Үрөөнэймнай
Намартааш, хабартааш намжаахан дээ.
Налгайхан сэдьхэлтэй эжынэрнай
Наһажаадш байхадаа хайратайл дээ.

Үргэхэн сагаахан Үрөөнэймнай
Үбэлдөөш, нажартааш намжаахан дээ.
Уужамхан сэдьхэлтэй абанарнай
Үбгэрөөдш байхадаа хайратайл дээ.

Һара сагаан – тунгалаг,
Һаруул тодо – мүнгэлиг.
Хараhайб мүнөө халагшье!
Ханилhайб шамтаяа, амараг!

Иимэ hүни байха аа гү?
Инаг намдаа ерэхэ аа гү?
Этигыш гэжэ хэлэхэ аа гү?
Эмнеэд гарым бариха аа гү?

Үбэл бэшэ – зун hай,
Үдэр бэшэ – hүни hай,
Үе наhанайм нүхэр hай,
Үнэн дуранайм жаргал hай.

Хүлэр талын харгыгаар
Хүтэл добын оройгоор
Шураюулхыса шураюулнаб
Шуһан зээрдэ морёороо,
Ту-гы!

Халюур дайдаар соёроошо,
Хазаар даран заадааша
Хатар жороо моринойм
Хурдан түргынь харагты.
Ту-гы!

Хүхуюн зугаа найрлаанда,
Хүлэг моридой байлдаанда
Урилдаад лэ илахаб
Ульгам зээрдэ морёороо
Ту-гы!

Дахяад урин хабар ерээд,
Дахяад урдан горхон шууяа,
Хүдөө дайдын агаар дорьбоон
Хүхы дуугаа татаа гоёор.
Ку-ку, кэ-кэ,
Ку-ку, кэ-кэ-кэ,
Хүхы дуугаа татаа гоёор.

Хүхын дуунай үе дулаан –
Хүбшын саһан хайлан һалаа.
Сэсэг, намаа, зүлгэ ногоон
Шэмээл нуга, тайгым гоёон.
Ку-ку, кэ-кэ,
Ку-ку, кэ-кэ-кэ, —
Шэмээл нуга, тайгым гоёон.

Үнгын сэсэг угтаад намай,
Үеым гансам, дурдаа шамай.
Дуугаа, хүхы, зүндөө татыш
Инаг, намайгаа, бү мартыш.
Ку-ку, кэ-кэ,
Ку-ку, кэ-кэ-кэ, —
Инаг, намайгаа бү мартыш.

Үргэлжэ һанаха сэдьхэлдэм
Үбгэн буурал Үндэрнүүд.
Үехэн наһандаа сэнгэһэн
Үлзы һайхан үдэрнүүд.

Дабталга:
Намартааш, хабартааш элдинээр,
Нажарай шэнжэтэй элбэгээр
Ногоолоо нютагтаа
Наһандаа мүнхэхэн жаргая.

Жэбхээһэн, Хужартайн бэлшэрһээ
Жэргээл дууша булжуухай.
Зуладал гэрэлтэй нютагнай
«Зүрхэн Хада» шэмэгтэй.

Дабталга

Аршаантай нютагайм хүбшэнүүд
Арса, нэрһэн…жэмэстэйл
Адаглиг Шандалиин хүбүүдүүд
Алдар суутайл үнинэй.

Дабталга

Эжынгээ абынгаа үреэлтэй
Элдин тоонто нютагтаа
Эрхимхэн хэрэгээр хүндэтэй
Энхэ тайбан һууял даа!

Дабталга

Зэрэлгээн үлгыгөөр дүүжэндөөд,
Жэргэмэл аялгаар бөөмэйлөөд,
Эдирхэн наһанайм энэ һайхан талмай
Эрьеэд лэ ерэхэдэм аятайл.

Дохилзоо һэрюухэн хуһан соо
Донгодон хүхыхэн урина.
Дуранайм эхинэй мүнхэ булаг эндэ
Добынгоо боориһоо бурьялна.

Һаруулхан тунгалаг сэдьхэлни,
Һалбараа улаалзай бэемни,
Эдирхэн наһанайм энэ һайхан тоонтотой
Эльгээрээш зүрхөөрөөш холбоотой.

Энэ манай Совет
Эгээл түрүүн хэлээн

Дабталга:
Энхэ тайбан байдал
Энэ дэлхэйн найдал,
Тайбан байдал,
Дэлхэйн найдал, найдал, найдал.

Туйлай хүндэ замаар
Тэмсээд, илаад гараал.

Дабталга

Улад зоной түлөө
Улаан тугаа үргөөл

Дабталга

Песня к борьбе зовёт,
С нами, друзья, вперёд!

Припев:
Надо мир отстоять,
Счастье людям всем дать,
Счастье людям всем дать!