Нютагууд

Ага найман эсэгынгээ
Түбөөр мандажа урматай
Арад зоноо эб эетэй
Тэгшээр үргөөлши хүндэтэй.

Дабталга:
Дасан Сүмэһөө буян хэшэгтэй
Дэлгэр жабхалан баян байдалтай
Түрүү зэргэдэ хүгжэн дабшаһан
Агамни, дуулан магтанаб.

Бом Хадын шанха оройһоо
Агаяа хараад хүхинэб:
Бүхы тээшээ тэниин гоёор
Аржын зохидоор урганаш.

Дабталга

Сэбэр салуу гудамжануудш
Сэсэг, модонууд хүбөөтэйл.
Шэнэ һүртэй барилгануудш
Сэдьхэл баясаан хүлгөөнхэйл.

Дабталга

Соёл, эрдэм, хэрэгээрээ
Суутай зонууд соош жарганаб
Нэрыш үргэхөөр хэзээдэш
Нангин хүсэлдэ абтанаб.

Дабталга

Үндэр хоёр Ууладаа
Үнтэй эрдэни шандантай,
Үргэн ниитэ уладаа
Урагшань даллаа Шандалимнай

Дабталга:
Ага Найман Эсэгэдээ
Ашаар ехэ үүргэтэй
Алдар суутай хүнуудэй
Аглаг тоонто нютагнайл даа.

Байгаа солодонь Агын
Онсо элитэ габьяатай
Багша, уран зохёолшын
Анхан мүндэлһэн Шандалимнай.

Дабталга:

Алтатай хүрьһэнһөө эхитэй,
Арюухан тунгалаг уһатай
Аглагхан дэлгэрхэн Шулуутай
Абымнил ашатай нютаг юм даа.
Улаан Шугытай, тайгатай,
Улаан Хуһата, Байгалтай,
Улаан Хададаа түшэгтэй
Угаймнил жаргаһан нютаг юм даа.

Дабталга:
Суутай анханай арад зонойнь
Нэрэ түрэдэ хүрэмөөр
Шулуутай нютагаа, тоонтоо,
Нүхэд, амжалтаараа үргэел!

Эрдэни баялиг эхитэй,
Эршэтэй һэндэртэй аршаантай,
Элдинхэн хэшэгтэй Шулуутайм
Эжымнил буянтай нютаг юм даа.
Сагаан заяатай хэрэгтэй,
Сагаан сэдьхэлтэй уладтай,
Сагаан хүмэгүүд гурьбатай
Сарюухан жабхалан нютаг юм даа.

Дабталга:

Алтан дэлхэйдэ намдаа тон үнтэйл
Аглаг жабхалан Агымнай тойрог.
Алдар солодонь дээгүүр хубитайл
Амгалан дэлгэр гур(а)бан аймаг:
Агым, Могойтым, Дульдаргым аймаг.

Холынгоо замы батаар тодолоод,
Хүгжэн манданал Агымнай тойрог.
Хэрэг ажалаар эрхим хододоо
Хурдан дабшанал гур(а)бан аймаг:
Агым, Могойтым, Дульдаргым аймаг.

Буян, хэшэгтэй зоноор урматай
Баян түүхэтэйл Агымнай тойрог.
Бэлиг түгэлдэр түрүү хэр угай
Бэрхэ уладтайл гур(а)бан аймаг:
Агым, Могойтым, Дульдаргым аймаг.

Уулаһаа үндэрхэн
Орьёл Алханал даа.
Үүдэн Сүмэтэй мүргэлтэй
Үзэсхэлэн орон даа.

Элдинхэн байгаалитай
Эрдэни Алханал даа.
Эхын Умайн түхөөлтэй
Энхэхэн түшэг даа.

Дэлхэйгээ шэмэһэн
Дэлгэр Алханал даа.
Далай Ламын морилһон
Дэмбэры Уулал даа.

Арюун сагаахан буянай булаг
Алтан ганжартай дасан хүреэмнай.
Арад зонойнгоо найдамтай түшэг
Амар жаргалайнь абрал үреэлтэй.
Амитхаашамнай мандана,
Амгалан байдал даллана.

Урма зоригой ниигэм үльгэрэй
Үлзы хутагтай хүсэлы одоо
Үргөөд аятайл hайхан хэндэмнайш
Үндэр Үлиртым хүндэтэй обоо
Амитхаашамнай мандана,
Амгалан байдал даллана.

Үеын үедэ энхэхэн тайбан
Улам хүгжэжэ дэмбэры байхын
Үршөөл хэтэдээ түхөөн бидэндээ
Уужам Агынгаа сууда хүндэтэй
Амитхаашамнай мандана,
Амгалан байдал даллана.

Амгалан Шэтын аймагта,
Яабалан шэлын хойморто
Үдэһэн халуун гуламтамнай
Үргэлжэ ухаан зүр хэндэмнай.

Дабталга:
Буянтай арадтай, баянхан хэшэгтэй,
Аглагхан үльгэрэй Ара Хяра нютагнай.

Үргэлтэй обоо Уулатай,
Үржэлтэй элдин хүрьһэтэй,
Амармаар зоной аршаан, нууртай
Алтарма таряалан нугатай

Дабталга:

Золтойгоор ород буряадай
Золголсон эбтэй эетэй,
Түбхинэн жаргаһан түүхэтэй
Түрэһэн жабхалан тоонтомнай.

Дабталга:

Хёлго Витим хоёрой
Хүгжэн дундань һалбарһан,
Үреэл буян хэшэгтэй
Угайм золтой жар гаһан

Дабталга:
Буряад зонойм сэдьхэл мэтэ
Аглаг салуу уужам
Энхэ түшэг буусаа зохёон һуумаар эндэ
Ара Хяра  нууртай нютагнай.

Салса,Ташаа, Үлзытэ
Шагша, Иван, Эргэнэ…
Үльгэр, домог, туужатай
Үлхөөн хүршэ нуурнуудтай

Дабталга:

Буурал Баабай, Бутуулта,
Баян Дэлгэр -Үндэрнүүд
Тахилгатай, үргэлтэй
Түшэг орьёл ууланууд

Дабталга:

Янза бүриин жэмэстэй,
Яаблан шэлэ энгэртэй,
Энхэ тайбан байдалтай,
Эрхим солоор алдартай

Дабталга:

Ардагхан моринойм ульгамда
Аргалиин харгы дардамхан даа.
Алагхан зүрхэнэйм урманда
Аялдар нүхэр бардамхан даа.

Унагшал моринойм хатарта
Урматайл юм даа Аргалимни.
Улаанхан зүрхэнэйм халуунда
Ушартайл юм даа инагхамни.

Гүйгөөшэл моринойм хурданда
Гүйхэхэй hорёон найдамтайл даа.
Гажарhан сэдьхэлэйм дуранда
Гансахан нүхэр хайратайл даа.

Үүлэн магнал хүнжэлтэй
Үндэр һүртэй мундарганууд.
Үльгэр, домог туужатай
Үнэр баян нютагууд.
Оюун бэлигээрээ тодорһон
Оюун дуушадаар суурхаһан
Буряад оронайм омогорхол
Баргажан, шамайгаа магтан дууланам.

Байгал далай үлгыдөө
Байса, намжар хабсагайнууд
Тайгань – жэмэс, ан, гүрөөл
Дайдань – хэмгүй баялигууд.
Эдлэн байгаалиин гамтайгаар
Энхэ бидэнэй жаргаһан
Буряад оронойм омогорхол –
Баргажан, шамайгаа магтан дууланам.

Атар малтай, үрэжэлтэй
Аглаг элдин нуга, хүнды
Арад зондоо хүндэтэй
Аршаан, обоонууд үлзы.
Бууса түхеэрээд буянтай
Байдалаа зохёомоор аятай
Буряад зонойм омогорхол –
Баргажан, шамайгаа магтан дууланам.

Будалан Уулымнай сэсэг ногоон соо,
Баатарай үбэрэй үлир мойһон соо
Баянхан нютагайм байгаалинь һайхан даа!
Вальсаяаш, ёохороош бүжэглэн сэнгэел даа.
Хүршэ: Хангил, Саһаша,
Хүнхэр, Гүнэй, Һүдэнтэ
Ойрын нүхэд, бултадаа
Орыт  манай дүхэригтэ.

Тойрожо тогломоор Тогоон Шулуутай,
Сэнгэжэ амармаар Сэрэг Нарһатай,
Баянхан нютагайм байгаалинь һайхан даа!
Вальсаяаш, ёохороош бүжэглэн сэнгэел даа.
Ага Найман Эсэгэ,
Алайр, Түнхэн, Хэжэнгэ,
Ород, буряад, бултадаа
Орыт манай дүхэригтэ.

Татууртай Ононой тохой эрьедэ,
Таряатай талымнай аглаг элдиндэ
Будалан нютагайм байгаалинь һайхан даа!
Вальсаяаш, ёохороош бүжэглэн сэнгэел даа.
Хамаг олон арадайм,
Эбтэй бүлэ бултадаа,
Хамта зугаа дэлгэхээ
Ерыт манай дүхэригтэ.

Соёлтой колхозойм салуу Ордондо,
Гэрэлтэй сэдьхэлэй һаруул оршондо
Будалан нютагайм арад зон хүхюу даа!
Вальсаяаш, ёохороош бүжэглэн сэнгэел даа
Орон түбиин залуушуул,
Юрын элдэб ажалшад,
Нүхэд байбал, бултадаа
Ерыт манай дүхэригтэ.

Дүрбэн сагууд соонь жэл бүри
Дурым арьбидхаа Зүдхэлим.
Угалза үлхөө гол нугаар
Үгсыт, һүндэлыт, гоёл байха!

Гурбан Баянхан, Сагаанайм
Гурьбынь дорьбоогоод жаргалтай,
Суеынь магтаһан шубуудай
Дууень шагнаял, гоёл байха!

Аршаан булагаар бурьялһан
Аргын ороншуу Угсаахайм.
Эхин дээрэнь бүхэли зун
Хүхиит, амарыт, гоёл байха!

Талаан бэлигээр алдартай
Түрүү суурхаһан арадтайм
Урма зоригоо холбожо,
Үелыт, ажаллыт, гоёл байха!

Тулмасаан, Аргали, Агымнай
Элдинхэн дуулимхан бэлшэртэнь
Партизан баатарнуудай алдары
Мүнхэлһэн нютагни сэдьхэлдэм:

Дабталга:
Хамтымнай ажахы гоёл һэн,
Хонгёохон солоороо омог һэн.
Түшэгни, одо заяамни —
«Гушан гурбан партизамни».

Үлиртэ, Нарһата, Шобогор…
Үндэрнүүд зэлэтэн жэрынэ,
Булагта, Гурбан Орой, Поосой,
Бултадаа бодолдом аржына:

Дабталга:

Бууралта, Харгыта, Элһэтээр
Балшархан наһамни бүмбэрөөл.
Баруун, Зүүн Амидхаашын сэсэг дээр
Бадаржа дурамни мүндэлөөл.

Дабталга:

Уужам Урда-Агынгаа нугаар
Уруудаа үгсөөш һаа, аятай
Үдэһэн эльгэн халуун гуламтаа
Урмашан эрьедэг заншалтайб.

Дабталга:

Дүрбэн нютагай бэлшэр
Будалан Уулынгаа оройһоо
Арбан зүгые шэртэн
Хабархан һууял даа сэсэгсоо.
Холын үндэр Алхана,
Долоон Хан Ууланууд,
Хүхэ Уула, Хангилнай
Гоёл харагдаад бүгэдэ.

Гүнэй нютагайм дэлгэр
Үржэлтэй дайдада ябалсаат,
Хүнэй жаргалы эдлэн
Үндыһэн нютагтайм танилсыт.
Хуһата, Нарин Хүндымнай,
Ульба, Наран Булаг,
Хоймор Наран Толгоймнай
Үргөөл намайгаа бүгэдэ.

Онон голойм мойһотой
Татууртай ольтирог хүрэһэйт.
Олон түрэлэй жэмэс…
Хахууляар загаһаш туршаһайт.
Таряан, ажал, малаараа
Түрүү зон алдартай
Танил болоод нютагтайм,
Тамнай, Гүнэйеым магтаһайт!

Онон голойм нуга, татуурнууд
Уран буряад угалза гэмэ.
Одоол  хабар үлир, мойһонууд
Дунгар бүреэ, хун шубууд мэтэ
Сэнгүүхэн Гүнэй шэмэглээ,
Сэнхирхэн Онон мүрэмнай,
Сэнхирхэн Онон мүрэмнай.

Будлан Уулын дээрэб, харанам:
Бүхы дайдам сэсэг соо үнгын.
Хүхэ Уула, Согто, Алхана,
Хан Ууланууд сэнхир соо холын.
Уняартаад Гүнэй дэнзэлээ
Үндэрхэн Будлан Ууламнай,
Үндэрхэн Будлан Ууламнай.

Наран Булаг, Ульба, Хамхагшаар
Атар малнай үдэн бэлшэнэ.
Наран Толгойн таряан халюураад,
Алтан долгёор даллан эбхэрнэ.
Баянхан Гүнэйм хэшэгтэй
Байгаалинь аглаг дайда лэ,
Байгаалинь аглаг дайда лэ.

Яла сала Ордон, һургуули,
Аргын байшан, тамирай талмай.
Ямар гоёб түбэймнай һуурин,
Аржын дасан угтаад аятайл.
Амгалан Гүнэйм жаргалтай,
Азатай золтой арадтайл,
Азатай золтой арадтайл.

Дуулимхан уужам дайдаар Элеэ гол
Булгилан Онондоо харьялна.
Дулдаргаа, дуунуудаа татан гоёор,
Баясан уладнай магтана.

Дабталга:
Сэсэрлиг мэтэ аад Дулдаргамнай
Солыень магтамаар һайхан лэ.

Анханһаа нүхэсөөд арадууднай
Амгалан, жабхалан жарганхайл.
Алхана, Саханай…түшэгүүдтэй
Алдартай амжалтаар дабшанхайл.

Дабталга:

Этигэл, хүсэл, найдал, дурамнай
Буянтай үлзыхэн манданал.
Энхэхэн хүгжэһэн Дулдаргымнай
Баянхан нютагууд һалбарнал.

Дабталга:

На просторах к Онону в приволье
Катит волны бурливо Иля.
Песни наши звенят по раздолью:
Мы поем о тебе, Дульдурга.

Припев:
Дульдурга, словно яркий цветник,
Звонких песен и славы родник.

В братской дружбе мы издавна жили,
В мире счастье свое здесь нашли.
Алханай, Саханай…дали силы,
Честь и славу в делах обрели.

Припев:

С верой, доброй надеждой, любовью,
Мы хранимые свыше, живем.
Дульдурга стала нашей судьбою,
С ней к заветным высотам идем.

Припев:

Алханын орьёлдо наран игаашоод,
Агымнай дайдада үдэрнэй манданхай.
Алтарма гэрэлтэй намжар туяагаар
Аяшаан Дулдаргым шэмэжэ үнжэнхэй,

Дабталга:
Үлир, мойһон соо аршаан тунгалаг
Элеэ мүрэмни, Онондоо яарыш,
Үльгэр һайханаар, Дулдаргам, урган
Үеын үедэ бидэнтэй жаргыш!

Эндэмнай тон эбтэй ород, буряад зон
Энхэхэн байдалаа зохёожо нүхэсөөл,
Эрдэмэй, соёлой гуламта болгон
Эршэмтэй Дулдаргаа хүгжөөжэ түбхинөөл.

Дабталга:

Ажалша баатарлиг, малша хэр угай
Арадаар бэлигтэйл аймагнай, нютагнай:
Алхана, Шандали, Тугшан, Табтаанай,
Балжана, Зүдхэли, Элеэ, Үзөөмнай.

Дабталга:

Сүмэтэй, дугантай, энхэ буянтай
Сагаахан харгытай, Дулдаргам, манданаш.
Агынгаа түүхэдэ дээгүүр хүндэтэй
Амжалта жабхалан урматай дабшанаш.

Дабталга:

Бурханай орон Алхана-
Буян хэшэгэй түшэгтэй,
Баян, жабхалан, амгалан
Байдалтай тэгшэ хүгжэнхэй.

Дабталга:
Алхана, Элеэ,
Балжана, Үзөөн,
Шандали, Зүдхэли,
Тугшан, Табтаанай
Агым түүхэдэ
Алдартай булта,
Дулдаргам, аймагнай
Суутай нютагуудтайл.

Үльгэр, домог, туужатай
Хатан Ононой хойморто
Угаймнай хэтын буусатай
Халуун бидэнэй тоонто

Дабталга:

Аршаан, ан, жэмэс-тайгатай,
Атар малнуудта дайдатай,
Обоо, дабаандаа үргэлтэй,
Өөдөө үндэр Хии моритой

Дабталга:

Соёл, эрдэмээр солотой
Баатарш, ажалшаш, бэлигтэйш,
Сугтаа нүхэсөөд азатай
Бүгэдэ жаргаа арадтай

Дабталга:

Алханын арюун hайхан аршаанда
Аажам сэнгэжэ амараял даа.
Аялга дуугаа, ёохор, вальсаа
Аятай нэрьен жаргаял даа.

Дабталга:
Дулдаргам, нютагуудш намжаахан даа,
Дуулим аад сэдьхэлдэм дулаахан даа.
Дуунуудаа зорюулан магтамаар даа
Нютагууднай.
Дулдаргам, араднай бэлигтэй даа,
Дэмбэрэл буянтай, хэшэгтэй даа,
Дэлгэрхэн байдалтай, солотой даа
Арад зомнай.

Уужам Ордон соонь бухы нютагтаа
Уулзан сэнгэжэ амараял даа.
Уран дуунуудаа, ёохор, вальсаа
Урматай нэрьен жаргаял даа.

Дабталга:

Хурим түрэдөө, найртаа, наадандаа
Хүхин сэнгэжэ амараял даа.
Хонёохон дуугаа, ёохор, вальсаа
Хамтадаа нэрьен жаргаял даа.

Дабталга:

Ага нютагнай, һалбаржал байхадаш,
Арад зонойнгоо жаргажал байхада,
Аша буянай дэлгэржэл байхада
Аяшаан дуулахам гоел байн даа.

Элдин Агамни, хүгжэжэл байхадаш,
Эбтэй зонойнгоо хурдалжал байхада,
Эрдэм, соёлойш бадаржал байхада,
Эльгэлэн дуулахам гоел байн даа.

Үргэн Агамни, ургажал байхадаш,
Улад зонойнгоо урдалжал байхада,
Үлзы байдалаа баталжал байхада
Урмашан дуулахам гоел байн даа.

Түрэл Агамни, мандажал байхадаш,
Түүхыш зонойнгоо үргэжэл байхада,
Түрүү солоороо суурхажал байхада,
Түүрээжэ дуулахам гоел байн даа.

Аршаан булатал арюун тунгалаг
Хэрлэн, Улза, Халха гол урдана.
Айлшаар буухые, үүдээ сэлинхэй,
Хүдөө нютагай айлнууд угтана.

Дабталга:
Баян тэнюун, энхэ амгалан,
Бүгэдэ найрамдаа арад мандана.

Алтан гургалдай, хүхы, жэргэмэл
Аглаг дайдадаа хүхин жэргэнэ.
Атар һүрэглөө табан хушуу мал,
Арьбан хэшэгтэйл, тобир бэлшэнэ.

Дабталга:

Обоо, найр дээрээ бара солотой,
Эрын гайхамшаг гурбан наадатай,
Олон уладай шэмэг болонхой,
Урдынш, шэнэнүүдш дуунай аятай.

Дабталга:

Буир нуурнай гүн сэбэр, тунгалаг,
Булгин загаһад, шубууд амарна.
Буян, заншалаа сахин нангинаар
Бата байдалтай зомнай мандана.

Дабталга:

Онсо гайхамшаг  Алхана Ууламнай
Орон дэлхээмнай одоол шэмэг юм.
Үлзы дэмбэры энхэ буянай
Үргэл мүргэлтэй нангин түшэг юм.
Урма зориг бадаргаа Агадаа
Угайнгаа үреэлээр жаргаад золтойб даа.

Хатан тунгалаг арюун Ономнай
Хамаг голоймнай эжы мүрэн гээ.
Агуу Чингисэй, Бабжа, Балжанай
Алдар домоглоо туужын эхин гээ.
Уран hонин түүхэтэй Агадаа
Угайнгаа үреэлээр жаргаад, золтойб даа.

Арса, тэрэнги, элдэб жэмэстэй,
Аглаг хүбшэ ой, антай, аршаантайл.
Аажам таламнай элдин, үржэлтэй,
Атар малдамнай hүнгэ, аятайл.
Үнэр баян хэшэгтэй Агадаа
Угайнгаа үреэлээр жаргаад, золтойб даа.

Тайбан найрамдаа улас түрэ соо
Түрүү зэргэдэнь дабшаад, жабхалан,
Эбтэй зоноороо суутай хододоо
Энхэ hалбарыш мүнхэ амгалан!
Үндэр тугтай жабхалан Агадаа
Угайнгаа үреэлээр жаргаад, золтойб даа.

Элдин Агын хойморто
Олон бэлшэр нуга бии.
Эндэ түрүү байдалтай
Онсо һайхан нютаг бии.

Дабталга:
Хэтэдээ амгалан,
Хэшэгээр жабхалан,
Залиршагүй одом
Нангин Ага-Хангил.

Хойноо урдаа намжаараа
Хангай аглаг шэлэтэй,
Хамаг жэмэс, аршаанаар
Хэшэг түгэс нютагнай.

Дабталга:

Агын түүхэ шэмэглээ
Алдар суутан эндэ бии,
Алтан дэлхэй зэдэлгээ
Агуу дуушын тоонто бии.

Дабталга:

Жэгтэй хангай хүбшэтэй,
Жэмэс, ангай хэшэгтэй,
Арсын хоншуу хангалтай
Аглаг хоймор Зугаалайн

Дабталга:
Суугаараа алдаршаа
Эршэтэй арюун аршаанһаань,
Дуунайнгаа аялгаар,
Хүртөөд, хүхижэ магтая!

Мүргөөд дасан дугандань,
Үргөөд түшэг ууладань,
Даамай тэнюун амаржа
Дэлгэр һайхан Зугаалайн

Дабталга:

Хүгжэм дуугаа зэдэлгээд,
Халуун дураа дэбэргээд,
Ёохор бүжэг, шог зугаань
Ёһоор гоёл Зугаалайн

Дабталга:

Элдинхэн Ушарбайн Зэмхэ, Шэбэшын
Эршэтэй аршаанууд гайхалтай.
Илдамхан гансаяа золгоол һаа эндэ шим
Энхэхэн жа(ра)гахаш  найдамтай.

Жэмэстэй Ушарбайн Зэмхэ, Шэбэшын
Жэнтэйхэн аршаанууд гайхалтай.
Заяатайл гансаяа золгоол һаа эндэ шим
Золтойхон жаргахам найдамтай.

Хоймортын Ушарбайн Зэмхэ, Шэбэшын
Хоёрхон аршаанууд гайхалтай.
Хубитайл гансаяа золгоол һаа эндэ шим
Хэтэдээ жаргахам найдамтай.

Баянхан Ушарбайн Зэмхэ, Шэбэшын
Бурьялаа аршаанууд гайхалтай
Баталһан гансаяа золгоол һаа эндэ шим
Буянтай жаргахам найдамтай.

Ушарбай нютагай Зэмхэ,Шэбэшын
Урасхал аршаанууд гайхалтай
Ушарһан гансаяа золгоол һаа эндэ шим
Үедөө жаргахам найдамтай.

Урда, Хойто Агануудай
Уулзуурһаань дээхэнүүр,
Гэрэл һаруул бэлшэр нуурай
Эрьеһээнь хойхонуур

Дабталга:
«Мир» солотой колхозтой
Минии нютаг хүгжэнэ.

Аршаан, булаг, нуга, хүбшэ –
Үрэжэлтэй газарта
Арад зоной баян хэшэг
Үргэжэ арьбадхаа

Дабталга:

Галта шулуутай «Сахюуртын»
Дулаахан хормойдо
Золтой бидэнэй түбхинэһэн
Заяатай тоонтодо

Дабталга:

Хони, малаа, таряалангаа
Атараар эрхилээд
Хамтын түрүү ажахыгаар
Алдаршаад эрхимээр

Дабталга:

Алтан дэлхэйдэ намдаа тон үнтэй
Аглаг жабхалан нютагтаа түрөөб.
Амгалан hайхан байдалтайш хэтын
Арюун сэбэрхэн минии Үзөөн,
Арюун сэбэрхэн минии Үзөөн.

Элеэ Ононой эрьеэр дайдатай
Эхэ нютагтаа жаргалаа олооб.
Энхэхэн үлзы, буян, хэшэгтэйш,
Элдин дэлгэрхэн минии Үзөөн,
Элдин дэлгэрхэн минии Үзөөн.

Арад зонтоео солыш үргэхэ
Аза талаантайл, нютагни, заяам.
Ажал хэрэгээр ашыш харюулхаб,
Абыш угтажа, минии Үзөөн,
Абыш угтажа, минии Үзөөн.

Агын солын баян түүхэ
Амжалтаараа үргэнхэй,
Алдар суута зоной бууса
Могойтоёо магтая.

Дабталга:
Догой,Ушарбай, Нарин, Зугаалай,
Урта, Хүһөөшэ, Ага-Хангил,
Сагаан-Уула, Сагаан-Шулуутай,
Хара-Шэбэр… – суутай нютагуудтай.

Үндэр таряан ургастай,
Үултэр һайтай малнуудтай,
Үлзы элдин энхэ һайхан
Могойтоёо магтая.

Дабталга:

Түбиин олон хото түбүүдтэй
Түмэр замаар холбоотой,
Хэдэн харгын бэлшэр нютаг
Могойтоёо магтая.

Дабталга:

Үгсэн шамдан ерэхэдэм
Үльгэр һайхан Шулуутайм
Уула хаданууд эбхэлеэтэн
Угтан, угтан зэрэлгээтээ.
Үндэр Сагаан Мунхантай,
Улаан Хада түшэгтэй,
Угайм аша буянтай,
Үлзы нютагни, мэндэ амар!

Мэнэл эрьен ерэхэдэм
Манай Байгал, Наянтайм,
Майла хаданууд эбхэлеэтэн
Манаа саран зэрэлгээтээ.
Үндэр Сагаан Мунхантай,
Үлзытэдээ түшэгтэй,
Угайм аша буянтай,
Үлзы нютагни, мэндэ амар!

Дахин яаран ерэхэдэм
Дуунайм эхин Шулуутайм
Дадал хаданууд эбхэлеэтэн
Даллан, даллан зэрэлгээтээ.
Үндэр Сагаан Мунхантай,
Улаан Хада, Үлзытэ,
Угайм аша буянтай,
Үлзы нютагни, мэндэ амар!

Арюун уһатай Онон мүрэнэй
Аажам тэнюухэн атар хойморто
Ажалша малша арад зонуудтай
Аятай нүхэдэйм аглаг нютаг бии.

Дабталга:
Тугаа дээрэ үргөөд габшагай
Тугшан анханай түрүү нютаг лэ!

Сэнхир тунгалаг Онон мүрэнэй
Сэсэг намаатай тэнюун дайдада
Сэдьхэлээр налгай улад зонуудтай
Сэнгүүхэн нүхэдэйм һайхан нютаг бии.

Дабталга:

Булгин харьялаа Онон мүрэнэй
Баян дэлгэрхэн элдин нугада
Бэлигтэй оюун бэрхэ зонуудтай
Буянтай нүхэдэйм жаргаа нютаг бии.

Дабталга:

Үлир мойһото Онон мүрэнэй
Үргэн намжаахан дулаан хүбөөдэ
Угайнгаа заншал үргөө зонуудтай
Үелһэн нүхэдэйм үлзы нютаг бии.

Дабталга:

Олон голоо хүтэлжэ,
Далай тээшээ тэгүүлөө
Оном, дайдынш дуулимда
Манай Тугшан сэсэглээл.
Онон, Тугшам үлзы
Омог манай үлгы.
Үлир ерыт, байхал.
Мүнхэ мандыш!

Монгол, ород буряадтаа,
Оном, дуун соонь магтуулааш,
Золгоод Шиилха, Амартаа
Манай мэндэ дамжуулааш.
Онон, Тугшам үлзы
Омог манай үлгы.
Дуулаад суугаа
Дэлгээл зугаа!

Түрүү алдар солоороо
Тугаа дээрэ үргэнхэй,
Түүхээр баян зоноороо
Тугшам суурхан жарганхайл.
Тугшам үлзы
Омог манай үлгы.
Энхэ үргыш,
Мүнхэ жаргыш!

Агын Найман соо алдартай,
Аглаг Сагаан Ууламнай,
Үндэр өөдөө Хии Моритой
Үлзы жаб халан нютагнай.

Дабталга:
Сагаан — Уула, зүрхэмни шиниил,
Сагаан — Уула, заяаншни миниил.

Тойроод үргэлтэй обоотой
Түшэг Сагаан-Ууламнай,
Түрүү зоной солоор суутай
Түүхээр жабхалан нютагнай.

Дабталга:

Бүхы арадтаа хүндэтэй,
Баян Сагаан-Ууламнай,
Буян түгэс сагаан замтай
Бата жабхалан нютагнай.

Дабталга:

Алдартай арадаар
Агадаа хүндэтэй,
Амжалта дабшалта
Ажалай түүхэтэй

Дабталга:
Сагаан-Уула, Сагаан уулам,
Солоо дууда, солоо дууда!

Байдалаар найдамтай
Баянхан тулгатай,
Байлдаанда гайхамшаг
Баатарлиг уладтай,

Дабталга:

Эрын гурбан наадаар
Эрхим дээгүүр суутай,
Сэдьхэл шэмээ дангина –
Сэбэрхэн хүүхэдтэй

Дабталга:

Табан хушуу малай
Дэлгэрхэн хэшэгтэй,
Таряан алтан далай
Долгилгоо дайдатай

Дабталга:

Үглөө бүри нараа угтан гарахадаа
Үлгэн дэлхэйн шарай хараад баясан,
Үндэр Сагаан Сахюурта Баабайдаа
Үргэдэг заншалтайб сайнгаа дээжые
Һайн байя, бүгэдөөрөө!

Хуби заяан, ажа байдалаймни һабагша,
Хужар зугаатай наһанаймни харгы
Энэ хадын боориһоо анханһаа
Эхи абаа байдалайм зам эндээ лэ.
Һайн байя, бүгэдөөрөө!

Үри хүүгэд, нютаг зонойнгоо һайн байхые,
Үеын үедэ амгалан һуухыень,
Үдхэн һутэй һайхан сайнгаа дээжы
Үбгэн буурал Сахюуртадаал үргэнэб,
Һайн байя, бүгэдөөрөө!

Баатарай оройһоо харан һуухадаа
Яатараа сэдьхэлни ханан хүлгэнэб:
Хүхэ Уула, Алхана, Хан Ууланууднай,
Хангилам шэлэ холуур хүхэрэнхэй.

Дабталга:
Сэлмэг номин тэнгэритэй,
Сэнхир Онон угалзатай,
Сэрэг, Һубаряа Нарһадтай
Сэлгеэ Үбгэеэ Хүнхэрнай!

Баримта туужатай үльгэр домогтой,
Бабжаяа, Балжанаа гайхан һананхайб.
Байдалдам тэдэм одо зулам болонхой,
Буянгаар үлзы найдал бадараанхай.

Дабталга:

Марсатай хужартай элдин таламнай
Малнуудташ, таряандаш атар хабатайл.
Магтаалтай ажал дээрээ энхэ араднай
Манайнгаа түүхэ шэмээд тон аятайл.

Дабталга:

Сэсэгээр сагаалхяад үлир мойһоднай
Сэмсэгэр хуримдаа зэһээ бэришүү.
Соёлтой хүгжэн ургаа дэлгэр нютагнай
Сэдьхэлээр тэнюун, дорюун уладтай бшуу.

Дабталга:

Агын эхин дабаанай
Алад саанань Табтаанай.
Гушан гурбан гурьбатай
Орьёл хангил Саханайтай.

Дабталга:
Табтаанай, Табтаанай,
Уран дууеыш дуулаял,
Табтаанай, Табтаанай,
Ууган сууеыш  үргэел.

Баян Сагаан хадынгаа
Боорёор атар буусатай,
Хангай хүбшэ, тайгадаа
Антай, элдэб жэмэстэй.

Дабталга:

Бэлиг түгэс талаантай
Бэрхэ зотой Табтаанай,
Баяр дүүрэн жаргалтай
Батажанхай нютаг лэ.

Дабталга:

Үнгэ бүриин сэсэгүүд соо
Уулзан аажам урдаһан
Урда-Хойто Агануудта
Уран дуугаа үргэел (үргэел)

Дабталга:
Урда — Ага, Хойто — Ага
Уһанайм тунгалаг эхин булагууд,
Урда — Ага, Хойто — Ага
Үедөө жаргалтай энхэ нютагууд,
Урда — Ага, Хойто — Ага, Ага, Ага!

Хонгор уужам дайдыш шэмээ
Колхоз бүхэн аржагар,
Дуулим хүнды нугаш нэмжээ
Дүүрэн буусаар дангигар (дангигар)

Дабталга:

Аглан нараар намжаа эрьеэрш
Ага – түбнай толорно.
Ага найман эсэгэнэр
Аялгаараа нэрьенэ (нэрьенэ)

Дабталга:

Дуулимхан Алхана, Саханайн
Домогтой туужатай дайдын дунда,
Дардамхан зам дээрэ манданхай
Дулаахан эльгэн гуламтамнай.

Дабталга:
Буянтай, жаргалтай
Баатарлиг арадтай,
Дулдаргаа магтан
Дуугаа баринам!

Сэнхирхэн Элеэгэй эрьедэ
Сэсэгтэй элдинхэн нугын дунда,
Сэдьхэлым эзэлээд энхэргэн
Сэнгэлэн һайхан гуламтамнай.

Дабталга:

Агынгаа түүхэдэ гайхамшаг,
Алдартай, хүндэтэй зоноор суутай,
Ашатай, үргэмжоөөр найдамтай
Аятай үлзы гуламтамнай.

Дабталга:

Зэрэлгээтэжэл харагданхай
Жэгтэйхэн һайхан Эхэ нютагнай
Зонойнгоо ашаар алдартай
Заяагаар үндэр Хара-Шэбэрнай.

Үржэлтэй баян ургасатай
Үнэрхэн элдин Эхэ нютагнай –
Үльгэртэл зузаан түүхэтэй
Уладаар эрхим Хара-Шэбэрнай.

Атархан малаа арьбажуулаа
Аглагхан үлзы Эхэ нютагнай –
Адлихан зоноо жаргуулаа
Ашатай үлгы Хара-Шэбэрнай.

Хүгжэнхэй байдал баталанхай
Хододоо бушуу Эхэ нютагнай –
Кировэй нэрээр суурханхай
Колхозоор түрүү Хара-Шэбэрнай.

Нангин угайнгаа түшэһэн тоонто
Ноён Уулынгаа намжаахан бооридо

Дабталга:
Хара-Шэбэртээл жарганхайб,
Хара-Шэбэрээл жар магтанхайб,
Хамаг тойроо нютагуудһаа
Гоёхон лэ хэзээш.

Түрэ, хуримдаш, түбэй ордондош
Дуугаа хүхюугөөр дүхэриг зэдэлгээл

Дабталга:

Хото, хүдөөдэш, холын орондош
Хонгёо омогоор хабархан дуулагшаб.

Дабталга:

Олон нютагаа гоёор,
Оном, шэмэн ерэнэш.
Ургаа манайшье нютаг
Хүһөөшэмнай эрьедэш.

Дабталга:
Сэсэг ногоо дэлгыш, талам,
Сэнгүү гоёор, шубууднай, жэргыт.
Эжэл түшэг эхэ нютаг,
Эршэ зориг, хүсэлым үргыш.

Урта, Гурбан Жаргалмай,
Таряан долгёор эбхэрнэ.
Ургэн талын нуурнуудай
Эрьеэр малнай бэлшэнэ.

Дабталга:

Ехэ, Бага «Үлгынүүд»
Үлир мойһоор надханхай.
Уулта, Хээтэй үндэрнүүд
Үльгэр туужаар угтанхай.

Дабталга:

Түргэн хүгжөө уладнай
Эрдэм, соел һалбаргаа.
Түрүү ажал урматай –
Эрхим солоор алдаршаа.

Дабталга:

Уужам нугаар Хатан Онон:
Үлир, мойһон, һөөгүүд олон.
Үлгэн дэлхэйн хэшэг элдин,
Үнэр баян минии нютаг.

Дабталга:
Үлзы энхэ үреэлтэй
Үбгэеэ Хүнхэр минии нютаг.

Бабжа Баатар, Сэрэг Нарһад,
Тогоон Шулуун, Уран Дүшэ,
Булам, Сүүгэл, Бумба, Хүһөө… –
Түүхээр һонин минии нютаг.

Дабталга:

Сөөрэм, Тоором… нуурнууд олон,
Суутайл аргаар Гарбуунхамнай:
Ялбаад һаруул гэрэл толёор,
Ямар гоёб минии нютаг.

Дабталга:

Эрын гурбан наадаар тэгшэ,
Эрхим түрүү зоноор жэгдэ,
Ажал, соёл хүгжөөн түгэс
Амжан мандаал минии нютаг.

Дабталга:

Эжым мүнхэ бэлэгынь
Энэ һайхан дэлхэймнил,
Эгээ үнэтэй шэмэгынь
Эхэ нютаг Шулуутаймнил.

Дабталга:
Алдартай зоноор баян, дэлгэр
Агым Шулуутайн дэбисхэр.

Абым хэмгүй бэлэгынь
Алтан уужам дэлхэймнил.
Агуу сэнгүй шэмэгынь
Анхан тоонто Шулуутаймнил.

Дабталга:

Хани нүхэд, гарбалайм
Халуун мүнхэ гуламта-
Хэтын үндэр ашатай
Хэзээш эльгэн Шулуутаймнил.

Дабталга:

Сэсэ тэ уужам тала нугатай,
Сэлмэг наратай, сэбэр агаартай,
Үлир мойһотой уула хадатай
Үргэн Агым Шулуутай.

Дабталга:
Яагаа гоёб даа таладайдам,
Үнгын сэсэгэйш угалзанууд,
Ямар зохидбэ хабар хээрэ
Уран шубуудайм дуунууд.

Дылгыров Дондогой нэрэ мүнхэлһэн
Дэбжэжэ түргэнөөр урган хүгжэһэн
Улаан Хадаяа түшэн түбхинэһэн
Үльгэр һайхан Щулуутайм.

Дабталга:

Алдартай солотой арад зонууднай,
Аятай зугаатай хүбүүд, басагаднай
Элдин нютагаа, энхэ жаргалаа
Эрхим хэрэгээр һалбаргаал.

Дабталга:

Жабхалан үеынгөө шэнэ һайхан
Жэгүүртэ дуунуудаа зэдэлүүлыт,
Жаргалтай зугаагай шэмэг байхынь
Жэрьесэ вальсаяа дүхэриглыт.

Дабталга:
Вальс, нүхэдни, вальс, вальс, вальс,
Бүжэглэн сэнгэел Шулуутайн вальс.
Вальс, гоёл вальс, вальс,
Шамайгаа уринам, дуратайл һааш.

Хамтынгаа ажалда хүдэржэжэ
Хатуужаад бэемнай хүнгэдэнхэй,
Хабатай амармаар вальсын хүгжэм
Ханхинаад долгиндоо үлгыдэнхэй.

Дабталга:

Сэсэг, намаатай Улаан Хададаа
Сэлмэгхэн нарамнай мандан байна
Сэнгүү сэдьхэлһээ бурьяа аялгаар
Шулуутайм вальсаараа даллан байна.

Дабталга:

Бултадаа анханһаа нютагайм зон
Бүгэдэ наадаша хүхюу юм даа
Бадаргаа түрүүшым дуры одоо
Вальсамнайш зүрхэндэм мүнхэхэн даа.

Дабталга:

Нэлэнхы хангай хүбшэтэй,
Хоймортоо шэбээ эхитэй,
Нараяа зүглөөд тэниинхэй,
Хэшэг баян гол нугатай

Дабталга:
Эжы абым үреэлтэй
Энхэ жаргаһан Ага-Хангилнай.

Дондог Эреэнһээ үргэлжэ
Үрөөнэйн шэлээр нэмжынхэй,
Дүүрэн һабадаа мэлмэлзээ
Үргэн Агадаа налюуртай

Дабталга:

Агуу түүхэтэ Илалтын
Солоор суурхаһан нютагнай,
Ажал соёлы тон тэгшээр
Хүгжөөн ургаа зон уладтай

Дабталга:

Улаан Шугынгаа хүбшэһөө эхитэй,
Улаан Хада Үлзытэ түшэгтэй,
Угаймнай хэтын жаргаһан түүхэтэй
Үлзы амгалан энхэ нютагнай

Дабталга:
Аба эжымнай нангин үреэлтэй
Агын Сагаан Шулуутай, Шулуутай!

Антай, жэмэстэй хоймортоо хүбшэтэй
Ара хангайдаа эршэтэй аршаантай,
Атархан малдаа элдинхэн дайдатай
Аглаг дэлгэрхэн энхэ нютагнай

Дабталга:

Байгал, Наянтай, Баруун, Зүүн Жэбхээһэн,
Бамбаа, Бүмбөөтэ, Замһа, Шандан Хүнды,
Харгыта, Дабхар, Жаргаланта, Гэртэ,
Хүрилгөөтэ, Обоотоор…сэнгэмээр.

Дабталга:

Шамбай абарга бүхэнүүд хүбүүдтэй,
Солоо дуудуулдаг хурданууд хүлэгтэй
Соёл, эрдэмээр алдартай арадтай
Сэсэн мэргэнүүд ашатай найжатай.

Дабталга:

Баян байдалаа,
Баяр жаргалаа,
Бата hайнахаар
Бадарган hалбаргаа
Солотой арадтай
Cогто-Хангилнай,
Элдин нарата
Эхэ нютагнай

Хамтын эршэтэй,
Хаба хүсэтэй,
Агын ажалай
Алдарай дэбисэтэй
Аялгаа нэгэдхээ
Cогто-Хангилнай,
Дээшээл дэбжэhэн
Дэлгэр нютагнай

Баатар зонуудтаа
Бара үргэдэг,
Энхэ жаргалаа
Илалтаар мүнхэлдэг
Солотой гэрэлтэй
Cогто-Хангилнай,
Шэнэ байдалтай
Эхэ нютагнай.

Дондог Эреэнэй дуулга шэмэг тайгада
Донгодон байгаа хүхын аялгаар,
Үлгэн Үльдиргэ, Хулинда нютагуудаа
Үгэлэн дуулан ябаха жаргалтайб.

Дабталга:
Дуунайм эхин, дуранайм эхин
Ага — Хангилнай, Ага — Хангилнай.

Ая гангата түрэл дайдым эльгэндэ
Аятай үе наһам жэргэнэл.
Алдар солынь һайхашаан үргэжэ,
Аялга дуумнай зохидоор шэнхинээл.

Дабталга:

Эхэ нютагни, жаргал дүүрэн гуламтам
Ирагуу дуугаар ходол ханхиныш!
Урган задарһан улаалзай сэсэгтэл
Үеын үедэ дэбжэжэ һалбарыш.

Дабталга:

Аглаг нэлэнхы Ага нютагнай
Ая гангаараа хангалтаа.
Атар тарган хонин һүрэгүүд
Аажам талаяа шэмэглээ.

Хүбүүд, басагад хүлэг моридоо
Хүсэ шадалаар табинхай.
Нармай дайдаар намжаан толоёо
Наран дэлгэжэ адханхай.

Элдин хабарай үнгын сэсэгтэл,
Эхэ нютагнай һалбараал.
Хамаг зомнай урган хүгжэжэ,
Хэрэг, үйлөөрөө алдаршаал.

Үргэн дэлхэйн энгэртэ
Үльгэр һайхан энхэргэн
Үеын үедэ бидэнэй
Үлзы нангин гуламта

Дабталга:
Амгалан тайбан мүнхэ жаргалтай
Ага түрэлхи нютагнай

Алдар солоор элирһэн
Арад зоноор золтойлши
Хонгор талаар бэлшэһэн
Хони малаар суутайлши.

Дабталга:

Арад зоной үршөөһэн
Алтан үлгым хүндэтэйш.
Дура зүрхөөр үреэһэн
Дуугаа шамдаа үргэнхэйб.

Дабталга:

Агын хоймор талада
Агы үндэр Алхана.
Арад зоной сэдьхэлдэ
Аятай hайханаар үзэгдэнэ.

Олон янзын ургамал
Өөдөө hубарин табсантаал.
Элдэб шубууд, ан, гүрөөл
Элдин тайгадаш амидараал.

Арюун хүүюур уhанууд
Аршаан байнал амарамаар.
Бартаа шулуун, хүмэгүүд
Байгаали шэмэглээд гайхамаар.

Орьел уула Алханамнай
Онсо һайхан шэнжэтэй
Үргэн анхарма бүгэдымнай
Үүдэн Сүмэ шэмэгтэй,
Аа-аа, аа-аа,
Үүдэн Сүмэ шэмэг.

Эржэн шулуун Алханамнай
Элдин бүхы баялигтай.
Эршээр түгэс амарамаар
Элүүр энхын аршаантай.
Аа-аа, аа-аа,
Элүүр энхын аршаан.

Буян хэдэг Алханамнай
Бүгэдымнай тахилгатай.
Дээдын ехэ Данзан-Жамса
Далай Ламын рамнайтай.
Аа-аа, аа-аа,
Далай Ламын рамнай.

Эдирхэн хонгорхон энэ наhандаа
Эмээхэй зулгыгаар энхэрэн абааш.
Эжэл газараа эрьен ерэхэдэм,
Энэрхы hайханаар эльгэлэн угтанаш.

Дабталга:
Аргали, Аргали,
Амгалан hайхан нютагнай, Аргалимнай.

Сарюухан заяагаар абын нэрые
Арюухан сэбэрээр үргөөд ябанаб.
Эжым юрөөлөөр дэлгэр замуудта
Эдэбхи найдалтай зорижо гаранаб.

Дабталга:

Артелиин түсэбөөр баян жаргажа,
Амжалта илалта баталан гарааш.
Ага нютагай элдин хойморто
Ажана тайбанаар аялгаа татанаш.

Дабталга:

1.Һайсахан Буряад орон нютагаа
Даамай ойндоо hанахадам,
Дайдань намжар уран зурагаар
Дандаа жэрын харагданал:
Адуу малтай атар хизаар —
Ага, Хори, Хэжэнгэмнай…-
Аглаг нэмжээ алтан таряан —
Алайр, Боохон, Эхирэднай…

2.Багажа түгэс, Гэсэр, Бабжын
Баатар hүртэй харуул мэтэ
Саян, Хамар Дабаан, Алханын
Сарьдаг орьёл мүнгэтэнэ.
Байгал далай –гэрэл hаруул
Байса эрьень аржын субаа.
Ольхон дээрэ наран гараад,
Оёор гүндэ жарган умбаа.

3. Олон нугын голы үлхөөд,
Холын замдаа хүтэлэнхэй
Онон, Ангар, Зэдэ, Сүхэ,
Хёлго, Витим, Сэлэнгэмнай.
Загаhаар элбэг сэбэр уhатай
Залгаа нууртай Яруунамнай,
Ангаар элдин хангай хүбшэтэй
Аха, Түнхэн, Баргажамнай…

Һайсахан Буряад орон нютагаа
Даамай ойндоо hанахадам
Дайдань намжар уран зурагаар
Дандаа жэрын харагданал…

Үргэлжэ Онон гол шэмэгтэй
Үржэлтэй элдин даа Гүнэймнай.
Үдэһэн бидэнэй хэтэдээ
Үреэлтэй жаргаһан нютагнай.

Дабталга:
Гүнэй бидэнэй баян хэшэгтэй
Заяан хубитай жаргаһан нютагнай.

Зэрэлгээ татаhан шэлэтэй
Заяатай энхэл даа Гүнэймнай.
Үетэн нүхэдэй эетэй
Үршөөлтэй жаргаһан нютаг лэ.

Дабталга:

Ажалдаа анханһаа солотой
Алдартай хүгжэһэн Гүнэймнай.
Бүгэдэ арадай хододоо
Буянтай жаргаһан нютагнай.

Дабталга:

Дуулимхан Алхана, Саханайн
Домогтой туужатай дайдын дунда
Дардамхан зам дээрэ манданхай
Дулаахан элгэн гуламтамнай.

Дабталга:
Буянтай, жаргалтай,
Баатарлиг арадтай
Дулдар(а)гаа маг(а)тан
Дуугаа баринам.

Сэнхэрхэн Элеэгэй эрьедэ,
Сэсэгтэй элдинхэн нугын дунда,
Сэдьхэлым эзэлээд энхэр(э)гэн
Сэнгэлэн hайхан гуламтамнай.

Дабталга:

Агынгаа түүхэдэ гайхамшаг
Алдартай хүндэтэй зоноор суутай,
Ашатай үргэмжөөр найдамтай
Аятай үлзы гуламтамнай.

Дабталга:

Сагаан Уулаа һанаад,
Сагаан зүүдэ манааб.
Сагаан Уулаа хараад,
Сагаан дуугаа татааб.

Дабталга:
Дуулыш зүрхэнэйм аялгы
Дуулим Эхэ нютагни.

Сагаан Уула шамдаа
Сагаан эдеэ үргөөд,
Сагаан Уулам, зондоо
Сагаан үреэл хүсөөб.

Дабталга:

Сагаан Уула эжым
Сагаан үлгын дуутайл.
Сагаан Уула хэтым
Сагаан замым нээгээл.

Дабталга:

1.Онон голой хойморто,
Олон хадын хормойдо
Налгай зоной гуламта
Наруули нютаг Зүдхэли.

Дабталга:
Зориг, хүсэ түрүүлдэг
Зүдхэли һайхан нютаг лэ,
Зүдхэли һайхан нютаг лэ.

2.Ая гангаар анхилаа
Аглаг дайдаар элдин даа.
Арса, жэмэс, аршаантай
Аятай тайгаар элбэг даа.

Дабталга:

3.Үндэр, үрэжэл баянаар
Үбһэ, таряа ургуулдаг.
Үүлтэр һайтай атараар
Үхэр, хони, мал үдхэдэг.

Дабталга:

4.«Эхэ Орон» колхознай
Эрхим түрүү алдартайл,
Энхэ ажал, байлдаандаш
Эрэлхэг баатар арадтайл.

Дабталга:

Алтан Түшэлгээ дэрлэн хонохоор
Ангирхан нарамнай тэгүүлжэл байн.
Аржагар галаараа Согто-Хангил нютагнай гоёор,
Ажахынгаа замые гэрэлтүүлэн байн.

Дабталга:
Хангил, минии Хангил, тоонто үлгы,
Хаба хүсэлым эршэлнэш,
Халуун hайхан анхарлаар
Хаанаш ябахадамни энхэрнэш.

Һөөгтэ, Ножодоо аадар адхараад
Һолонгоор наадаhаар сэлмэжэл байн.
Аглагхан агаарай уужам элдин Хялымнай талаар
Атар тарган малнууднай бэлшэжэл байн.

Дабталга:

Хатан хушуунууд уулзан зүүдэлээд,
Ханилhан хоёртол сэнгэжэл байн.
Эрдэни шулуугаа Согто Ууламнай ехээр дэлгээд
Эхэ hайхан орондоо бэлэглэжэл байн.

Дабталга:

Үльгэр домогто түрэл нютагнай
Үзэсхэлэн сэсэгээр hалбаржал байн.
Урматай зоригтой, эбтэй, эетэй, жаргалтай
Урагшаал, урагшаал дабхижал байн.

Дабталга:

Аршаан булагаар горхонш харьялдаг
Арюун дулаахан Һүдэнтэ нютаг.
Анханда эндэл аятай тэнжэжэ,
Айдархан наһаяа үнгэргөөб наадажа.

Жэрьеэ шубуудай дуугаар зэдэлдэг
Жэгтэй хонгёохон Һүдэнтэ нютаг.
Жагсажа, эрын солые дуудажа,
Жаргаа һэм энгэртэш инагтаа дурлажа.

Хангай дайдаараа ходол суурхадаг
Халюун налгайхан Һүдэнтэ нютаг.
Хоймортош түрэ хуримаа бүтээжэ,
Хабатай һууналби, ашыеш хүндэлжэ.

Халюун тэнюун аглаг тала,
Харьяа номин үргэн Онон.
Энэ манай эжы, абын
Эхэ газар ямар гоёб!

Дабталга:
Онон, Тугшан, Онон, Тугшан!
Онсо hайхан манай нютаг!

Yлир, мойhоор надхаа шугы,
Yнгын сэсэг дэлгээ дайда,
Уран дуугаар жэргээ шубууд
Yлгэн нютаг ямар гоёб!

Дабталга:

Талаан хубиим түшэг одон
Түргөөр дэбшээ колхоз «Онон».
Тугаа дээрэ үргөөд ходо
Түрүү дабшаад, ямар гоёб!

Дабталга:

Шэбээ хоймор шэлэ,
Хялын дэлгэр тала,
Сэнхир Сагаан нуурнуудтай
Сэбэр аршаан булагуудтай,

Дабталга:
Сагаан-Шулуутайм,
Хүгжөөд, омог суутайш,
Сагаан-Шулуутайм,
Хонгёо олон дуутайш. 

Жэлэй дурбэн сагта
Жэгтэй гоёл малда
«Олонш», «Арынш булагууд»-
Одоол атар нуганууд,

Дабталга:

Таряа абаад ехээр,
Малаа үдхөөд бэрхээр
Түрүү шармайн хүдэлөөд,
Түгэс дүүргөөд түсэбөө,

Дабталга:

Агуу сагтай тэнтэй
Ажал, соёл тэгшээр
Улад зомнай урматай
Yргэн дабшаад габшагайл,

Дабталга:

Хүнэй золоор мандажа
Хүгжэм татан жэрьеһэн,
Хүлэг морёор дабхижа
Наран тээшэ зүдхэһэн
Мундаргата Түнхэмни–
Алтаргана нютагни.

Аадар соогуур үнгэрхэ
Айдар наһаар орьёлһон,
Байдал золоо үнгэлхэ
Баатарнуудаа дэгжээһэн
Түүхээр ехэ Түнхэмни–
Түбхинэһэн нютагни.

Ая гангаар хангалтаа
Аршаангаараа билтарһан,
Жаран үнгөөр миралтаад,
Жаргалаараа жэгдэрһэн
Үлгы зөөлэн Түнхэмни –
Үнэржэһэн нютагни.

Ага һайхан нютагаймнай
Ара хоймор дэрлэжэ,
Ашата аба эжымнай
Алтан бууса һэргээжэ –

Дабталга:
Омог солгёон наһандам
Олон бэшэ, гансахан
Түрэл нютаг Аргалим –
Түмэн жэлэй жаргалан.

Зориг дүүрэн залуугайнгаа
Золто дуугаа зохёожо,
Түрэ найраа наһанайнгаа
Түбхинүүлэн бүтээжэ, —

Дабталга:

Жэмэстэй ойтой нютагаа
Жэрын дуулан хүндэлжэ,
Үнэн сэхэ ажалайнгаа
Үльгэр түүхэ харуулжа, —

Дабталга:

Yргэн Сагаахан Улзамнай
Yбэлдөөш нажартааш дулаахан.
Ушарhан гансахан амарагни
Yелхэл бүридөө дурламаархан.

Хабтагай Сагаахан Улзамнай
Хабартааш намартааш дулаахан.
Ханилhан гансахан амарагни
Ханилхал бүридөө дурламаархан.

Улзын гол (Улза гол)
Монголдо жэнхэни буряадууд ажаhуудаг

1.Хүһөөшын адагай хабсагайн дундуур
Хүхэ шулуун эрьеэ эсхэһээр
Хүсэтэй Ономнай, эбхэн долгёо жүдхөө,
Хүүеэл, хааяал эршэмтэй.

2.«Тэнхэхэ Толгоймнай» үбэрээр нэмжээ
Тэгшэ талаар угалза хээлэн,
Сэбэрхэн уһаяа түлхин мэлмэрһээр
Сэхэ мүрэмнай зүүлээл.

3.Хэтэ мүнхын үе сагта суурхуулһан
«Хээтын» агы уута гайхамшаг,
Уртымнай шэмэжэ үзэсхэлэн болоо
Урдын һонин домогтойл.

4.Хан Уула найр наадаар суутай обоотойл,
Адуун Шулуун үндэр обоотойл.
Уртымнай түшэлгэ обоо Мануухаймнай
Үлзы байдал далланхайл.

5.Утахан Уртаяа алдаршууланхай
Улад зониинь тэнюун түбхинөөд,
Эжынгээ, абынгаа нангин буянгаар
Энхэ тайбан жарганхайл.

1.Энээгүүр ургаһан сэсэгүүд соо
Эжынгээ шарайе харанам.
Эжынгээ шарайе харахадаа,
Эртэнэйнь буусые һананам.

Дабталга:
Дулаахан амисхаалтай Үзөөн нютагни,
Дуулимхан урасхаалтай Онон мүрэмни

2.Араараа ургаһан сэсэгүүд соо
Ахынгаа шарайе харанам.
Ахынгаа шарайе харахадаа,
Анханайнь буусые һананам.

Дабталга:

3.Хойгуураа ургаһан сэсэгүүд соо
Хоерхон шарайень харанам.
Хоерхон шарайень харахадаа,
Холынгоо буусые һананам.

Дабталга:

Үлир, мойhотой шугытай
Онон, Элеэ мүрэмнай,
Угайм анханай буусатай
Олон хүнды нугамнай.

Дабталга:
Үлзы бидэнэй энхэ жаргаhан
Үзэсхэлэн hайхан Үзөөн нютагнай
Үндэр хүсэлэйм одоор бадаран,
Урма, зоригым үргэнхэйл.

Уужам нютагнай түшэглөө
Үндэр хада, уулатайл.
Ан бун буянтай байдалы
Аахарайлаа дасантайл,

Дабталга:

Арьбан хэшэгтэй малнууднай
Атар тарган, үдэсэтэйл.
Арбай эдеэшээ таряамнай
Алтан долгёор далланхайл.

Дабталга:

Агын түүхэдэ солотой
Арад зоноор алдартайш.
Ажал, соёлы габшагай
Амжан, хүгжэн манданхайш.

Дабталга:

Наруули сагаахан Үрөөнэймнай
Намартааш, хабартааш намжаахан дээ.
Налгайхан сэдьхэлтэй эжынэрнай
Наһажаадш байхадаа хайратайл дээ.

Үргэхэн сагаахан Үрөөнэймнай
Үбэлдөөш, нажартааш намжаахан дээ.
Уужамхан сэдьхэлтэй абанарнай
Үбгэрөөдш байхадаа хайратайл дээ.

Үргэлжэ һанаха сэдьхэлдэм
Үбгэн буурал Үндэрнүүд.
Үехэн наһандаа сэнгэһэн
Үлзы һайхан үдэрнүүд.

Дапталга:
Намартааш, хабартааш элдинээр,
Нажарай шэнжэтэй элбэгээр
Ногоолоо нютагтаа
Наһандаа мүнхэхэн жаргая.

Жэбхээһэн, Хужартайн бэлшэрһээ
Жэргээл дууша булжуухай.
Зуладал гэрэлтэй нютагнай
«Зүрхэн Хада» шэмэгтэй.

Дабталга:

Аршаантай нютагайм хүбшэнүүд
Арса, нэрһэн…жэмэстэйл
Адаглиг Шандалиин хүбүүдүүд
Алдар суутайл үнинэй.

Дабталга:

Эжынгээ абынгаа үреэлтэй
Элдин тоонто нютагтаа
Эрхимхэн хэрэгээр хүндэтэй
Энхэ тайбан һууял даа!

Дабталга: