Песни на стихи Дагба Ринчинова

Сэнгүүхэн жаргаһан түрэлхэн нютагаа
Шэртэжэл даамайхан харахадам
Сэбэр аршаан бурьялаад,
Сэлгеэ дайдам манараад,
Сэсэг намаа угалзаар
Сэдьхэл ханаан бадараа.

Дабталга:
Дүүрэн аша буянтай Ага нютагтаа жарганхайб!
Дуугаа үргэн урматай ажаһуухада аятайл!

Аажамхан дуулимхан түрэлхэн нютагаа
Адаглан даамайхан харахадам
Аадар сэлмээд һолонго
Аржын һүртэй матараад,
Бүхы үнгэнь тон гоёор
Бэлиг түхөөн задараал

Дабталга

Һарынгаа сагаанда түрэлхэн нютагаа
Һайхашаан даамайхан харахадам
Дадал дээрэм мүшэдэйм
Толон хурсаар ялараад,
Даллаа намай нүхэдэйм
Зула мэтээр бадараа.

Дабталга

Уужам дэлгэр дайдадаш
Урма зориг бадаржа,
Дуулим элдин hайхандаш
Дуунууд гоёор мүндэлнэ,
Ага – Хангил, Ага – Хангил.

Эмшуу аршаан унданhааш
Энхэ элүүр жагсанаб.
Хэшэг баян ажалhааш
Хүдэр хүхюу жарганаб,
Ага – Хангил, Ага – Хангил.

Аха зонойм дүнгэhэн
Аша буян тон унэтэйл.
Алдар солыш үргэлсэн
Ажа hууха хүсэлтэйб,
Ага – Хангил, Ага – Хангил.

Шааяан сууряатаа харьяатай
Үргэн Ононой дуулимда
Шаазан сэсэгээр сагаалхинхай
Үлир мойhоной хоншуу hүүдэртэ

Дабталга:
Зэрэлгээн намжаа таладаа
Зэдэлгэн хонгёо аялгаа
Арюун омогоор, нүхэдүүд,
Ага нютагтаа магтаал үргэе

Хүхы жэргэмэл бульжуухайн
Гурган жэрьеhэн дайдада
hүртэй аржагар Сэрэг Нарhанай
Зүлгэ намаатай хибэс талмайда

Дабталга

Түрын хүлгэмэ баярташ
Эрын нэрьемэ наадандаш
Дууша,бүжэгшэ оюун бэлигтэд
Туужа домогоор баян дэлгэрхэн

Дабталга

Агымнай гоёхон сэсэрлиг
Ёохороош, вальсаяаш нэрьемээр юм даа.
Агаарынь сэлгеэхэн сэбэр лэ —
Ёhоорхон аятай сэнгэмээр юм даа.

Дабталга:
Суутайхан Агынгаа солыень
Анханhаа нангинаар үргэел даа.
Сэбэрхэн арюухан байдалынь
Ашатай хэрэгээр бэхилэел даа.

Эмээлгуй амьтадтай карусель —
Эршэтэйнь эрьелдээд гүйлгэмөөрхэн лэ,
Элдэбээр хүхигты – аттракцион
Энеэлдэн зугаагаа үйлдэмөөрхэн лэ.

Дабталга

Дээшэмнэй огторгой туласа
Дүүжэмнай нүхэдтэйм абаашанал даа.
Дэлхэймнай хүсэтэй татаса
Доошомнай тон түргэн бусаанал даа.

Дабталга

Орьдоhотой хүгжэмтэй хатартаа
Одоошье хабаяа харуулаял даа.
Олоороо ханхинса Агадаа
Омогоор дуунуудаа зорюулаял даа.

Дабталга

Игаан мандаhан улаан нараа
Будалан Уулада угтанам,
Дулаан намжаа эхэ нютагаа
Баясан хаража урмашанам.

Yргэн дайдадам агаар хабар
Жэргэмэлэй дуун соо манарна.
Yлир мойhон сагаан сахаляар
Зэрэлгээн долгин соо тамарна.

Сэрэг Нарhад Бабжын туужа
Домогы хүхытэй үльгэрлөө.
Шэнэ сагай хонгёо дуунуудые
Омогоор татажа дүхэриглөө.

Трактор олон даа: гүндүү хүгжэм
Талаяа доhолгон зэдэлнэ,
Түлөөр баян хүхюун малшад-
Хабараар Будалам эбхэрнэ.

Үлир, мойhотой, үнгын сэсэгтэй дайдадаа
Уhаар сэбэрхэн Элеэ, Ономнай харьялна.
Дэлгэр буянтай дэмбэры hайхан байдалтай
Дулдаргам, аймагнай дээшээ солотой hалбарна.

Дабталга:
Дулдаргам, нангин одо заяаш минии лэ,
Дуунуудни, хэрэг, бэлиг, талаам шинии лэ.

Эжы абынгаа энхэ түбхинөөд хүгжөөhэн
Эхэ нютагтаа эзэн байхадам — жаргал лэ.
Эжэл зонтоео эбтэй, эетэй хэзээдэш
Эршэлэн хабаяа эндээл зорюулха — хүсэлнил.

Дабталга

Үе сагтаяа үлзы аймагнай зэргэхэн
Урагшаа үшөөл улам габшагай дабшая.
Баян байдалаа бата hайханаар арьбадхан
Буянтай хэшэгтэй бүри жабхалан мандая.

Дабталга

Суутайхан аймагтаа
Согтойхон залуудаа
Сугларан аятайгаар
Солыень магтаял даа.

Дабталга:
Дульдаргам, шинии үндэр hаруул одоншни
Өөдэм уряалан сагаан замдам ялараал.

Анханай аймагтаа
Айдархан хаhадаа
Айлшалан бусахадаа
Ашыень hанаял даа.

Дабталга

Үлгыхэн аймагаа
Үетэн эрьехэдээ
Урахан аялгаяа
Урмашан татаял даа.

Дабталга

Үнэн эхин дурамнай
Угсаахайда тохёогоол.
Угаа залгаа нютагнай
Үлзы жаргал түхөөгөөл

Дабталга:
Ухаан, бодол, сэдьхэлэйм
Һайхан шэмэг, инагниш
Сагаан нангин хүсэлэйм
Һаруул зулань Зүдхэлимниш.

Эхэ нютаг, түүхэдэм
Эжы, абын соло байн.
Эльгэн тоонто буусадань
Эзэн hууха буян байн.

Дабталга

Хэмгуй баян хэшэгынь
Хүгжөөн эдлэн жаргаял.
Хонгео дуугаар Зудхэлеэ
Хаанаш, хэзээш магтаял.

Дабталга

Үндэр Баян Сагаанууд
Үргөөд мандаа хүндэтэйл.
Үбгэд, хүгшэд, нүхэдүүд,
Үнтэй жэнтэй үреэлтэйл.

Дабталга

Хөөрыш, дурдыш,
Хүүгэдхэн гүлмэр зулгы наhаяа
Хүхииш, дуулыш
Хонгёохон эдир солгёон хаhаяа.

Дабталга:
Айдархан бидэнэй одо заяа
Найдамтай үргэhэн багшанар
Жаргаха болтогой!
Аятай замаймнай эхи табяа
Агымнай hургуули алдаршан
Мандаха болтогой!

Шэбээ ногоон
Сэнгэмэ hургуулиимнай сэсэрлиг,
Шамтай номоо
Сүлөөдэ дабтаhымнай үльгэрлэг.

Дабталга

Жэрьен субаад
Жэгдэхэн жэлнүүд зэлэ татана
Юрьен ургаад
Залуушуул мэнэл дүүргээд тарана.

Дабталга

Һаншаг сагаан
Болоош hаа эндэ уулзаад хүхюутэй
Һонор хонгор
Үееэ hанахабди сортоотой.

Дабталга

Уран дуугаар Зүдхэлиеэ
Дуулан магтан хүхие.
Үлзы сагаан хэрэгээр
Дээшэнь солынь үргэе.

Дабталга:
Үндэр хүсэлым далижуулаад,
Урматайл түрэл hайхан нютагни.

Бэеын тамир эршэлэжэ,
Угсаахайдаа амарая.
Баяр дүүрэн сэдьхэлhээ
Сууень дуулан магтая.

Дабталга

Һайхан зугаа Зүдхэлидээ
Согтой дэлгэжэ сэнгэе.
Баян түүхынь үргэжэ,
Золтой энхэ жаргая.

Дабталга

Уринхан хабарай зэрэлгээн.
Ургыхан сэсэгэй дэльбэлээн.
Уяхан нюдэдэй эмнисгээн.
Урахан дуранай эршэдээн.

Дабталга:
Дулаан нарам, дулаан
Дурым, хабар, дурым
Һаруул хурса элшээрээ туяараад,
Урин hаруулаар туяарыш.

Халинги горходой шааялдаан,
Хүхинги шубуудай дуулалдаан,
Хүлгэнги зүрхэнэй гуниглаан,
Хүсэтэй дуранай үерлөөн.

Дабталга

Хүбшэдэ хүхымнай донгодоон,
Хүдөөмнай зүлгэлээд ноб ногоон,
Ханилhан хоёрой золголсоон,
Хуримай болзоры зүбшэлсөөн.

Дабталга

Үндэрхэн Улаан Хададаа
Үетэн нүхэд сугларжа
Уужам дэлгэр нютагаа
Дуулан нэрлэн магтая.

Дабталга:
Аажам хонгор үдэшэ
Амараял сэнгэел.
Анхан түрүүшынгөө дурые
Аятайгаар дуулан hэргээел.

Ара Сагаан Шулуутайнгаа
Аглагхан арюун аршаанда
Айдар нүхэд сугларжа,
Һайхан тоонтоо магтая.

Дабталга

Харьялаа шулуун булагай
Сэсэгээр надхаа талмайда
Хани нүхэд сугларжа,
Шулуутайгаа магтая!

Дабталга

Аажам зугаалхаар үдэшэлэн
Агамнай, сэсэрлигш гоёл байн даа.
Айдар залуухан үетэндэ
Амаран сэнгэмээр зохид байн даа.

Дабталга:
Түлэг наhамнай – Агадаа,
Бэлиг талаамнай – Агадаа,
Мүнхэ гуламтамнай – Агадаа,
Энхэ буямнай – Агадаа.

Бэрхээр эрдэмээ шудаламаар
Томонууд hаруулнууд hургуулимнайл.
Бэеын шадалы баталамаар
Тамирай ехэнүүд ордонууднайл

Дабталга

Агуу Илалтын нангин хүшөө
Алдартай хэрэгтэ зоригжуулна,
Агым гайхамшаг байдал мүнөө
Ашатай хүсэлы далижуулна

Дабталга

Арюухан үглөөнэй улаахан наранаар
Алтанхан гургалдайн жэргэхэдэ,
Аяшаан зүрхэнhөөм мүндэлөө аялгаа
Аглагхан нютагтаа татанхайб.
А-я, hэй-я, hэй, а-я, hэй-я, hэй…
Аглагхан нютагтаа татанхайб.

Игааhаар үглөөнэй мандаhан наранаар
Ирагуу булжуухайн жэргэхэдэ,
Эльгэлээд зүрхэнhөөм зэдэлээ аялгаа
Элдинхэн нютагтаал баринхайб.
А-я, hэй-я, hэй, а-я, hэй-я, hэй…
Элдинхэн нютагтаал баринхайб.

Хонгорхон үглөөнэй хурсахан наранаар
Хонгёохон хүхынгөө донгодомсоор
Хабархан зүрхэнhөө ханхинаа аялгаар
Хододоол нютагаа магтанхайб!
А-я, hэй-я, hэй, а-я, hэй-я, hэй…
Хододоол нютагаа магтанхайб!
Хододоол нютагаа магтанхайб!

Айдар залуудаа,
Абьяастай хурдандаа
Агуу удхатай
Абынгаа мэргэн захяагаар
Ажабайдал дээрээ
Алдуугүйгөөр ябаял даа.

Эдир залуудаа,
Эршэтэй хаhадаа
Энхэ буянтай
Эжынгээ нангин үреэлээр
Энээхэн наhандаа
Эндүүгүйгөөр ябаял даа.

Һонор залуудаа,
Хонгорхон хаhадаа,
Һайхан ашатай
Багшынгаа сэсэн hургаалаар
Хэтынгээ замые
Бата тодоор шэлэел даа.

1.Дуулим намар анханда
Дурым татаа hургуули.
Үндэр сагаан ордондоо
Үетэн соомни оруулаа.

Дабталга:
Ашатай, үзэл суртаалтай
Агынгаа hургуулиин оюутанби.
Наранда ялалзаад үглөөгүүр
Намайгаа угтанхай сонхошни
Жэрэгэнэн hубаряад хэшээлнүүд
Жэнгирээд гоёнхайл хонхошни.

2.Үзэг тоодо тотихон
Ухаам hонор ороhоор.
Үльгэр, туужа, онтохон
Уншажа ехээр hонирхооб.

Дабталга:

3.Дүршэл баян түбhэндэ
Дарханш, дуушаш, зурагшаш
Бэлиг абьяас түгэлдэр
Багшаяа даган hурагшаб.

Дабталга:

Зугаа, уран наадандаа
Омог солгёон, хүхюутэй
Залуушуулнай бултадаа
Ойрош, холош суурханхайл.
Могойтоео hайханаар
Зугаа наадаар суурхуулаал.
Арад зомнай hайхашаан
Амжалтаарынь баясаал!

Эрын гурбан наадандаа
Илалтаараа гүйсэдхэн
Эдир залуу үетэн
Эндэш, тэндэш алдаршаал.
Могойтоео hайханаар
Илалтаараа суурхуулаал.
Арад зомнай hайхашаан
Илалтаарань баясаал!

Адли тэгшэ эзэмшээд,
Ажал, соёл бэлигтэй
Айдар хүбүүд, басагаднай
Амжалтаараа суурхуулаал
Могойтоео hайханаар
Бэлигээрээ суурхуулаал.
Арад зомнай hайхашаан
Гүн сэдьхэлhээ баясаал.

Наадан хэзээш hонин даа,
Наhан залуу hонор даа.
Наартай зугаа хүхюухэн:
Наашаа ерыт бушуухан

Дабталга:
Бэлшэр нуурай долгилосо,
Бүхы зоной хүхисэ
Сахюуртадам дүхэриг татан
Сэнгэел, жаргаял!

Залуу хаhа гоёл даа,
Зулгы нүхэдш олон даа.
Заяан гансаа золгохо
Золтойш байжа болохоб.

Дабталга:

Сэсэг гэхээр арюухан
Сэбэр хүүхэд дорюухан,
Сэдьхэл дурым бадаргаа
Шамай шэлээб, яахабши?

Дабталга:

Сэсэн сэбэр дангина,
Сэдьхэл зүрхөө үршөөгыш
Сэнгэн, жарган эдлэжэ
Сугтаа hууял, зубшөөгыш.

Зулгы налгай дангина,
Заяа хубияа үршөөгыш,
Зоной дунда жаргажа,
Золтой hууял, зубшөөгыш.

Хонгор арюун дангина,
Халуун зүрхөө үршөөгыш,
Хэтын жаргал эдлэжэ,
Хамта hууял, зубшөөгыш.

1.Эрхимхэн солотой нютагтаа
Энхэхэн ургажа жарганхайб.
Эрдэмдэ hургаhан hургуулияа
Эльгэндээл hайханаар hананхайб.

Дабталга:
Хара-Шэбэр жаргалтай
Эхэ нютагнайл,
Суутай Мажиевай
Нэрэтэ hургуулимнайл.

 2.Һалбаран хүгжэhэн нютагтаа
Һайханаар дуунуудаа баринхайб.
Һүбэлгэн бэлигтэй багшынгаа
Һургаалынь нангинаар сахинхайб.

Дабталга:

3.Yргэhэн баянхан нютагаа
Yргэлжэ баясан магтанхайб,
Урдалhан ажалша арадhаань
Урмашан жэшээень абанхайб.

Дабталга:

4.Хүгжэжэ hалбараа нютагтаа
Хүхижэл дуунуудаа баринхайб,
Хүндэтэй хүн болгоо hургуулияа
Хододоо hайханаар hананхайб.

Дабталга:

1.Аглаг манай Угсаахай, Угсаахай
Амархаяа ерыта, ерыта.
Аргынь шанар даамай даа, тон даамай
Аршаан хүртэн уугыта, hуугыта.

Дабталга:
Ээ-hэй, Угсаахай!
Эршэтээхэн аршаантайл!
Ээ-hэй, Угсаахай!
Энхэ байхыш зальбарнам!

2.Сэбэр агаар, аршаанhаань Угсаахайм
Сэдьхэл, шарай, бэетнай заhархал.
Энэ тэрэ эмгэгhээ hаланхай
Элүүр hархайн хүхихэт, маhархат.

Дабталга:

3.Шэнэ үнэн дуранууд, Угсаахай,
Шинии ашаар мүндэлэн тохёогоол.
Хурим түрөөр түбхинөөд тэдэмнай
Ходо шамай хүндэлэн хүхилдөөл.

Дабталга:

4.Солгёон баяр магтаалаа,Угсаахай,
Нэрьен шамдаа хүргэжэ дуулаял.
Сорьёо эршээр hэндэртэй аятай
Бурьян мүнхэ угтахыш үреэел.

Дабталга:

Шабар уурхай заhанхай
Зуhалан дээрэм угтадаг
Шабжархай хөөрхэн хараасгайм,
Зугаашни хэды хүхюу hэм.

Үхэр, бурууды тогтоожо,
Үдэшэ, үглөө гүйхэдэм
Урда хойгуурни орёожо,
Угтан, үдэшэн ниидэхэл.

Сүлөөтэ жэгүүртэн сооhоо
Хараасгай нүхэртэйм адли
Сугтаа байрладаг арад зоноор
Хаана шубуухай бии юм хаб?..

Шулуун гоё гэрнүүд бодоод,
Үрхэ, тооногүйл – харамтай:
Шуран багым нүхэр одоол
Үгыл, хаанабши, хараасгайм?

Дэлхэйн шэмэг үнгын сэсэг
Дэлгэн надхан угтаа,
Дэлгэр ниигэм бодол сэдьхэл
Дээрэ үргэн даллаа

Дабталга:
Дуугаар хонгёохон
Могойтым аймаг,
Суугаар бата жабхалан
Ургажа хэтэ мандыш!

hаруул гэгээн hара нараар
Хэзээш сэлмэг угтаа,
hайхан сэбэр hанаа сэдьхэл
Хүсэл үргэн даллаа,

Дабталга:

Баян элдин хэшэг дэлгэн
Баяр түхөөн угтаа,
Буян арюун заяа хубиим
Yндэр одоор даллаа.

Дабталга:

Сэсэг, намаа, талатай
Шулуун Тоором нютагаа
Сэдьхэл шэмээ аятай
Шэнэ дуугаар магтая.

Дабталга:
Уран дуунайм аялга,
Уряа болон ханхиныш,
Улад зонойм баясама
Урма зориг бадаргыш!

Эдир залуу үетэн
Элдин эхэ нютагтаа,
Һайхан дуугаа үргэн,
Ирагуу гоёор магтая.

Дабталга:

Хатар, зугаа, баяраар
Халуун эльгэн нютагаа
Хамта солгёон аялгаар
Ходо хүгжөөн магтая.

Дабталга:

Уран дууеым, ажалым,
Шулуун Тоором абаарай!
Yлзы жаргал эдлэжэ,
Yргэн магтааб, шагнаарайт!

Дабталга:

Арад зонойм ехэ наадан –
Анхан урданай хүхюу найр наадан.
Буряад зонойм гоё наадан –
Бара, солотой эрын гурбан наадан

1.Орон дэлхэйн буряад арад зон
Одоол мүнөө суглараад,
Эрын гурбан нааданда
Эрхимүүдынь тодор(о)хонь.

Дабталга:
Хурдан хүлэг моридуудай урилдаан,
Хүдэр шамбай бүхэшүүлэй барилдаан,
Эбэр номоор hур харбаан,
Ирагуу бара, солын зэдэлээн.
Э – hэй!

2.Бүхы дэлхэйн буряад арадай
Бэлигтэйшүүл суглараад,
Баяр дүүрэн сэнгэжэ
Барисаагаа бэхил(э)хэнь.

Дабталга:

Арад зонойм ехэ наадан –
Анхан урданай хүхюу найр наадан.
Буряад зонойм гоё наадан –
Бара, солотой эрын гурбан наадан.